डम्मर बुढा मगर, बागलुङ
विश्वभर महामारीको रुपमा फैलिएको कोरोना भाइरसको संक्रमणलाई मध्यनजर गरी बागलुङबाट संचालन हुने लामो दूरीका यातायातहरु रोकिएका छन् ।
सरकारले चैत १० गतेदेखि लामो दूरीका यातायातहरुलाई रोक्नको लागि निर्देशन दिएपछि यातायातका साधानहरु रोकिएका हुन् ।
जिल्लाका विभिन्न स्थानहरुमा संचालन भए पनि लामो दूरीमा भने सोमबारबाट संचालन नहुने धौलागिरी कालिका यातायात प्रा.लि अध्यक्ष विष्णुप्रसाद अधिकारी जानकारी दिनुभयो ।
उहाँले सरकारले अर्को निर्देशन नदिएसम्म लामो दूरीको यातायात बन्द हुने भन्दै छोटो दूरीमा भने संचालन हुने बताउनुभयो ।
यस यातायात प्रालिबाट बुटलव, काठमाडौ, नारायणद्धाट, पोखरा, बुटलव लगायत देशका विभिन्न स्थानमा गाडीहरु संचालन हुँदै आएका छन् । प्रा.लिले बुटवल चल्ने गाडी आइतबारबाटै बन्द गरेको अधिकारीको भनाई छ ।
धौलागिरी गण्डकी यातायात सेवा सेवा प्रालिले भने आधिकारीक रुपमा यातायात बन्द गरेको छैन् । सरकारले गाडी संचालन बन्द गर्र्न निर्देशनको लागि पत्र नपठाएको हुँदा लामो तथा छोटो दूरीमा चल्ने यातायातहरु बन्द नभएको रुट इन्चार्ज रामप्रासाद अधिकारी बताउनुभयो ।
उहाँले बाहिरी जिल्लाबाट आउने गाडीहरु आइरेको भन्दै बागलुङबाट अन्त जाने यात्रुहरु नहुँदा गाडीहरु बसपार्कमै रोकिएको बताउनुभयो । अधिकारीले लामो दूरीमा संचालन नभए पनि छोटो दूरीमा भने संचालन भइरहेको बताउनुभयो ।
समितिद्वारा यातायातका साधानहरु देशका मुख्य शहर पोखरा, काठमाण्डौ, नारायणघाट, विरगञ्ज लगायतका स्थानमा चल्दै आएका छन् ।
