आदर्श अनलाइन, काठमाडौ
वीर अस्पतालमा उपचाररत अवस्थामा मृत्यु भएका १ महिला र १ पुरुषको कोरोना भाइरस (कोभिड–१९) परीक्षणको रिपोर्ट नेगेटिभ आएको छ ।
आइतबार भर्ना भएकी ३७ वर्षीया १ महिना र सोमबार नै भर्ना भएका ५० वर्षीया पुरुषको वीर अस्पतालमा उपचारका क्रममा मृत्यु भएको थियो ।
मृत्यु भएको दुवै जनालाई कोरोना संक्रमणको आशंकामा स्वाव (नमूना) संकलन गरी परीक्षणका लागि राष्ट्रिय जनस्वास्थ्य प्रयोगशाला टेकु पठाइएको थियो । तर, प्रयोगशालाबाट प्राप्त रिपोर्टमा दुवै जनालाई कोरोनाको संक्रमण नदेखिएको वीर अस्पतालका निर्देशक डा केदार सेञ्चुरीले जानकारी दिए ।
काठमाडौंको सतंगुल घर भएकी ३७ वर्षीया महिला र भारत घर भइ काठमाडौंको कालिमाटी बस्दै आएका ५० वर्षीया पुरुषको सोमबार मृत्यु भएको थियो ।
मृत्यु भएकी महिला यसअघि पनि मधुमेह, पिसाबको संक्रमण र आइपोटेन्सन लगायत समस्याबाट ग्रसित थिइन् ।
परिवारका सदस्यहरुले उनको कोरोनाका कारण मृत्यु नभएको भन्दै सोमबार नै अस्पतालबाट शव बुझेर लगिसकेका थिए ।
५० वर्षीय भारतीय पुरुषलाई भने बेहोस अवस्थामा सोमबार बिहान ११ बजे वीर अस्पताल ल्याइ पु¥याइएको थियो । उपचारकै क्रममा दिउँसो १ बजे उनको मृत्यु भएको थियो ।
अस्पतालका अनुसार सोमबार मृत्यु भएका ५० वर्षीय भारतीय पुरुषको भने मंगलबार अपराह्न मात्रै कोरोना संक्रमण नदेखिएको रिपोर्ट आएपछि आफन्तहरुले बुझेर लगेका छन् ।
यसअघि आइतबार राति ललितपुरको लगनखेलस्थित पाटन अस्पतालमा पनि १ जना बिरामीको पनि उपचारकै क्रममा मृत्यु भएको थियो । अस्पतालले कोरोना संक्रमणको आशंकामा नमूना संकलन गरी परीक्षणका लागि पठाए पनि रिपोर्ट भने नेगेटिभ आएको थियो ।