आदर्श अनलाइन,बागलुङ
बागलुङ नगरपालिका–४ कुँडुले फेदी स्थित श्री मुक्तिनाथ वेद विद्याश्रम आधारभुत बिद्यालयले पछिल्लो बिवादका बिषयमा संस्कृत पढ्न चाहने कसैलाई पनि कुनै किसिमको भेदभाव नगरिएको दाबी गरेको छ ।
विद्यालय व्यवस्थापन समितिका अध्यक्ष सहदेव राजभण्डारीले प्रकाशित गरेको बिज्ञप्तीमा केही सञ्चार माध्यम र सामाजिक सञ्जालमा आएको बिषय भ्रमात्मक रहेको जिकिर गर्दै संस्कृत विषय पढ्न कुनै भेदभाव नरहेको उल्लेख छ ।
बिज्ञप्तीमा विद्यालयले कुनै जाति, धर्म, परम्परा र संस्कृति विशेषको पक्षपाती नभई कुनै पनि विषय र विधा पढ्न पाउने बालबालिकाको मौलिक हकको उच्च सम्मान गर्ने जनाइएको छ । अहिलेसम्म कसैलाई पनि पढ्ने अधिकारबाट वञ्चित नगरिएको र यसको स्वतन्त्र अध्ययन र अनुगमनका लागि खुला आह्वान गरिएको छ ।
यो संस्कृत विद्यालय सबै समुदायको सहयोगले चलेको र संस्कृत पढ्न जुनसुकै धर्मावलम्बी र जातिकालाई खुला रहेको अध्यक्ष राजभण्डारीले बताउनुभएको छ । कुँडुले निवासी चन्द्रकान्त पौडेलले संस्कृत अध्यापनमा जातीय विभेद भएको बताए पछि अहिले वेदविद्याश्रम बिवादमा मुछिएको छ ।
