आदर्श अनलाइन, बागलुङ
नेपाल सूचना तथा सञ्चार केन्द्रीय सहकारी संघका उपाध्यक्ष तथा प्रतिनिधि सभाका सदस्य मनकुमारी जिसी केसीले आम समुदायको दुखको साथी बनेको सहकारी क्षेत्रको साख बढाउनका लागि म्यानेजर्सहरुको भूमिका प्रभावकारी बनाउनु पर्नेमा जोड दिनुभएको छ ।
कोअपरेटिभ म्यानेजर्स क्लव (सिएसी) बागलुङले सोमबार आयोजना गरेको जिल्ला सहकारी संघ तथा विषयगत सहकारी संघका अध्यक्षहरुसंगको परिचय तथा छलफल कार्यक्रमको उद्घाटन गर्दै सांसद केसीले यस्तो बताउनुभएको हो ।
आम सहकारीकर्मीहरुको बल र मेहनतका कारण आज सहकारी क्षेत्र आम समुदायको विपदको साथी बन्दै गएको छ, सांसद केसीले भन्नुभयो–कतिपय सहकारीहरुका कारण यसलाई कमजोर बनाउने काम पनि हुदै आएकाले यसको साख बचाउनका लागि म्यानेजर्सहरुको भूमिकालाई थप शसक्त बनाउनु पर्दछ ।
सहकारी अभियानलाई बलियो बनाउनका लागि अभियानकर्मीहरुको ऐक्यवद्धतामा जोड दिदै सांसद केसीले क्षणिक फाइदाका लागि अभियानलाई कमजोर बनाउने काम गर्न नहुने बताउनुभयो । उहाँले सहकारी ऐनको कार्यान्वयनमा जोड दिदै ऐनमा भएका कमी कमजोरी सच्याएर अगाडि बढ्नु पर्ने बताउनुभयो ।
कार्यक्रमका अन्य वक्ताहरुले सहकारीका कर्मचारीहरुको क्षमता अभिवृद्धि गर्दै सहकारी अभियानलाई थप प्रभावकारी बनाउन म्यानेजर्स क्लवको भूमिका प्रभावकारी बनाउन सुझाव दिनु भएको थियो । उहाँहरुले सहकारी ऐनको कार्यान्वयन लगायत सहकारीप्रति जनताको आकर्षण बढाउनका लागि अग्रमोर्चामा रहेर काम गर्ने कर्मचारीहरुको भूमिका हुने भएकाले क्लवले त्यस्ता विषयमा ध्यान दिनु पर्नेमा जोड दिनु भएको थियो ।
कार्यक्रममा राष्ट्रिय सहकारी महासंघका सञ्चालक हुमा कुमारी जि.सी.(अञ्जु), राष्ट्रिय सहकारी बैंकका सञ्चालक रामबहादुर जिसी, नेपाल सूचना तथा सञ्चार केन्द्रीय सहकारी संघका लेखा सदस्य खीम बहादुर कार्की, जिल्ला सहकारी संघ बागलुङका अध्यक्ष दिपक गौतम, बहुउद्देश्यीय सहकारी संघका अध्यक्ष दुर्गा बहादुर कुँवर, कृषि सहकारी संघका सचिव गंगा बहादुर थापा, नेपाल पत्रकार महासंघका सचिव राम थापा अविरल, राष्ट्रिय सहकारी बैंक बागलुङ शाखाका प्रमुख युवराज त्रिपाठी लगायतले मन्तव्य व्यक्त गर्नु भएको थियो ।
क्लवका अध्यक्ष दिपक राजभण्डारीले क्लवको उद्देश्य र आगामी कार्ययोजनाका बारेमा जानकारी गराउनु भएको थियो । उहाँले सहकारीका कर्मचारीहरुको नेतृत्व विकास तथा क्षमता अभिवृद्धिसंगै सहकारी क्षेत्रमा देखिएका संभावनाहरुलाई अगाडि बढाउन र चुनौतीहरुको सामनाका लागि एकतावद्ध भएर अगाडि बढ्नका लागि क्लव गठन गरिएको जानकारी दिनुभयो ।
कार्यक्रम कोअपरेटिभ म्यानेजर्स क्लव (सिएमसी) बागलुङका अध्यक्ष राजभण्डारीको अध्यक्षता, सचिव ताराप्रसाद शर्माको सञ्चालन, कोषाध्यक्ष मुना शर्माको स्वागत र सदस्य टिकाराम सापकोटाको धन्यवाद मन्तव्यमा सम्पन्न भएको क्लवका उपाध्यक्ष दिपकराज सापकोटाले जानकारी दिनुभयो ।
