आदर्श अनलाइन, लमजुङ
पर्यटन प्रवद्र्धन गर्ने उद्देश्यले लमजुङमा राइनासकोट पर्यटन महोत्सव सुरु गरिएको छ । ३ दिन सञ्चालन हुन लागेको महोत्सव ‘ग्रामीण संस्कृति जोगाउ हाम्रो नारा ! खेलकूद विकास गरौं’ भन्ने नाराका साथ राइनास नगरपालिका–९ मा राइनासकोट सामुदायिक घरवास समितिको आयोजनामा सुरु भएको हो ।
नगर प्रमुख सिंहबहादुर थापाले महोत्सवका माध्यमबाट देशविदेशमा प्रचारप्रसार हुने र पर्यटन प्रवद्र्धनमा टेवा पुग्ने बताएका छन् । राइनासकोटलाई नगरपालिकाले पर्यटकीय गन्तव्यका रुपमा प्रवद्र्धन गर्दै आएको उनको भनार्ई छ ।
वडा नं ९ का वडाध्यक्ष देवबहादुर थापाले यस्ता महोत्सवले पर्यटन प्रवद्र्धनमा ठूलो सहयोग पुग्ने भएकाले बेलाबेला जिल्लाका विभिन्न गाउँमा समेत आयोजना हुनलाई जरुरी रहेको बताएका छन् । महोत्सवका आयोजक राइनासकोट सामुदायिक होमस्टे व्यवस्थापन समितिका अध्यक्ष खड्कबहादुर गुरुङले पहिलो पटक महोत्सव सञ्चालन गरेर गाउँमा पर्यटक भित्र्याउन गरिएको बताए । कोरोना संक्रमणपछि पर्यटकको संख्यामा कमी भएकाले पर्यटक भित्र्याउनका लागि महोत्सव सञ्चालनले मद्दत पुग्ने आयोजकको अपेक्षा छ ।
बिहीबारदेखि सुरु भएको महोत्सवमा लोकदोहोरी तथा लोक गायक राजु परियार, सरिता दर्नान, प्रशान्त तमाङ, रितु थापा, सुवास छितिज कलाकारको प्रस्तुति रहने आयोजकले जनाएको छ । महोत्सवमा १२ कक्ष राखिएका छन् । महोत्सवमा विभिन्न स्थानबाट अवलोकनका लागि सयौंको संख्यामा उपस्थित भएका छन् । त्यस्तै राइनासकोट पर्यटन कप सञ्चालन हुने भएको छ । उक्त समितिको आयोजनामा यहाँ आजदेखि पुरुष तथा महिलाका लागि भलिबल प्रतियोगिता सञ्चालन हुन लागेको छ । प्रतियोगितामा पुरुष भलिबलतर्फ विजयी टोलीले १ लाख, ट्रफी, मेडल र प्रमाणपत्र, द्वितीय हुने टोलीले ५० हजार, मेडल र प्रमाणपत्र प्राप्त गर्नेछन् ।
त्यस्तै तृतीय हुने टोलीले ३० हजार, मेडल र प्रमाणपत्र तथा शान्त्वना हुने टोलीले २० हजार, मेडल र प्रमाणपत्र प्राप्त गर्ने आयोजकले जनाएको छ । त्यस्तै महिलातर्फ प्रथम टोलीले २५ हजार, मेडल र प्रमाणपत्र तथा द्वितीय पुरस्कार १५ हजार, मेडल र प्रमाणपत्र प्राप्त गर्ने सो समितिका अध्यक्ष गुरुङको भनाई छ । यस गाउँमा १७ घरमा घरवास सञ्चालनमा छन् ।
घरवासबाट एकै पटकमा अन्नपूर्ण, माछापुच्छे«, मनास्लु, बौद्ध, गणेश हिमाललगायतको १८ हिमाल देख्न सकिन्छ । विश्वकै पहिलो योगस्तम्भ पनि राइनासकोटमा छ । ऐतिहासिक राइनासकोट किल्ला, थानीमाई मन्दिर, कालिका, कोटेश्वर महादेवलगायत ऐतिहासिकस्थलसमेत रहेका छन् । नेपालका बाइसेचौबीसे राज्यकालमा लमजुङका राजा यशोबह्मा शाहका कान्छा छोरा द्रव्य शाहले राज्य सञ्चालन गरेर राइनासकोटमा बसेको इतिहास छ ।
जनतासँग स्वास्थ्य कार्यक्रम सुरु
यहाँका नागरिकलाई स्वास्थ्य पहुँचबाट बञ्चित हुन नदिन जनतासँग स्वास्थ्य कार्यक्रम बिहीबारदेखि सुरु गरिएको छ । जिल्लाको मस्र्याङ्दी गाउँपालिकाको सहयोगमा वडा नं ४ ले वडाभित्रका नागरिकलाई लक्षित गर्दै जनतासँग स्वास्थ्य कार्यक्रम सुरु गरिएको हो ।
सो वडाको च्याम्चेमा १ कार्यक्रमबीच गाउँपालिका अध्यक्ष अर्जुन गुरुङले शुभारम्भ गर्दै गाउँपालिका नागरिकको स्वास्थ्यलाई पहिलो प्राथमिकतामा राख्दै अघि बढिरहेको बताए । नागरिकको स्वास्थ्यलाई लक्षित गरी सञ्चालन भएको यस कार्यक्रमले नागरिकको स्वास्थ्यमा पहुँच पुग्ने बताउँदै उनले पालिकाका अन्य वडामा पनि विस्तारै कार्यक्रम लागू गर्ने जानकारी गराए ।
वडाध्यक्ष सुमन गुरुङका अनुसार ४० वर्षमाथि उमेरका नागरिकलाई सेवा दिने उद्देश्यका साथ कार्यक्रम सुरुआत गरिएको र वडाका २० टोलमा कार्यक्रम सञ्चालन हुने भएको छ । पहिलो दिनमा सो क्षेत्रका ७० नागरिकको स्वास्थ्य जाँच गरिएको थियो ।
