–आदर्श अनलाइन, बागलुङ
स्वार्थ भन्दा माथि रहेर सेवा गरौ भन्ने नाराका साथ सामाजिक कार्यमा सक्रिय रोटरी क्लव अफ बागलुङले धौलागिरी अस्पताललाई बिभिन्न सामाग्री सहयोग गरेको छ ।
कोरोना संक्रमणका बिरामीहरुको उपचार गर्दै आएको अस्पताललाई बिरामी र स्वास्थ्यकर्मीको सहजताका लागि २ वटा अक्सिजन कन्सनट्रेटर मेसिन, ३० थान पिपीई सेट र २ प्याकेट ग्लव्स सहयोग गरेको हो ।
करिव ४ लाख ५० हजार बरावरको सामाग्री क्लवका अध्यक्ष दयाराम शर्मा पौडेल र पदाधिकारीहरुले अस्पताल बिकास समितिका अध्यक्ष केवि राना मगर तथा निमित्त मेडिकल सुपरिटेण्डेन्ट डाक्टर शैलेन्द्र बि पोखरेललाई हस्तान्तरण गर्नु भएको थियो ।
समाग्री ग्रहण गर्दै अस्पताल बिकास समितिका अध्यक्ष रानामगरले समाजिक क्षेत्रमा सक्रिय रोटरी क्लवसंगको सहकार्य बिगतदेखि नै रहेको र अस्पतालको सम्मृद्धि तथा बिकासका लागि प्राप्त सहयोग सामाग्रीको सदुपयोग हुने बताउनुभयो ।
बिभिन्न दाताहरुको सहयोग र सहकार्यका कारण धौलागिरि अस्पतालको स्वरुप फेरिएको र सेवा समेत प्रभावकारी रुपमा अगाडि बढेको उल्लेख गर्दै उहाँले आगामि दिनमा पनि क्लव र अस्पतालबिचको सहकार्य निरन्तर रुपमा हुने बताउनुभयो ।
कार्यक्रम क्लवका अध्यक्ष दयाराम शर्मा पौडेलको अध्यक्षता, आगामि अध्यक्ष सञ्जयकुमार श्रेष्ठको स्वागत र सचिव रामकृष्ण शर्माको संचालनमा सम्पन्न भएको थियो ।
रोटरी क्लवद्वारा अस्पताललाई अक्सिजन कन्सनट्रेटर सहयोग
