आदर्श अनलाइन, बागलुङ
नेकपा एमाले केन्द्रीय सदस्य गोविन्द नेपालीले एकीकृत समाजवादी विचार र सिद्धान्तहीन पार्टी भएको बताउनुभएको छ ।
राष्ट्रिय युवा संघले आयोजना गरेको बागलुङको जैमिनी नगरपालिकाको नगर स्तरीय भेलामा बोल्दै नेपालीले सामाजवादी पार्टी धोकेबाजहरुले खोलेको आरोप लगाउनुभयो ।
माधवकुमार नेपालले नेपालको कम्युनिष्ट आन्दोलनलाई बुढानिलकण्ठको शेरबहादुर निवासमा बिसाईदिने सपना देखेको उहाँको भनाई थियो । नेपालीले युवाहरु नयाँ जोस र जागरका साथ आगाडी बढ्नु पर्ने भन्दै देशलाई विकासको बाटो लैजान युवाहरुलाई सकारात्मक उर्जाका साथ अगाडि बढ्न आग्रह गर्नुभयो ।
राष्ट्रिय युवा संघ नेपालका उपाध्यक्ष सन्तोष रावलले अहिलेको युवाहरु कुनै न कुनै क्षेत्रबाट उत्पादनमा जोडिनु पर्ने बताउनु भयो । युवाहरु आर्थिक रुपमा सवल बन्दै देशलाई समुन्नतिको बाटोमा लैजानका लागि महत्वपूर्ण भूमिका खेल्नु पर्ने रावलले बताउनुभयो । रावलले वर्तमान सरकार भारतको आर्शिवाद र इशारामा बाँचेको भन्दै अब देउवा सरकारको आयु धेरै नभएको बताउनु भयो ।
नगर भेलाले उदय हमालको अध्यक्षयतामा ९१ सदस्यीय राष्ट्रिय युवा संघ जैमिनी नगरमा कमिटी गठन गरेको छ ।
कार्यक्रममा नेकपा एमाले प्रदेश सदस्य लिला राना, संसदीय विभाग सदस्य संघीय सांसद सूर्य पाठक, गण्डकी प्रदेश सांसद सावित्री राना, नेकपा एमाले जिल्ला सचिवालय सदस्य प्रदिप थापा, नेकपा एमाले जिल्ला सचिवालाय सदस्य रुद्र आचार्य, नेकपा एमाले जिल्ला सदस्य बद्रि ढुङगाना, नेकपा एमाले जिल्ला सदस्य बिदुर पौडेल र राष्ट्रिय युवा संघ नेपालका केन्द्रीय सदस्य साधना पन्तले मन्तव्य व्यक्त गर्नुभएको थियो ।
कार्यक्रम जैमिनी नगरका युवा नेता अमिर सुवेदीको अध्यक्षयता, राम पोडेलको स्वागत र देवेन्द्र रेग्मीको संचालनमा सम्पन्न भएको थियो ।
