रोहन जि.सी, बागलुङ
आदर्श सञ्चार सहकारी संस्था लिमिटेड बागलुङले संस्थाका शेयर सदस्यको निधन प्रति दुःख व्यक्त गर्दै श्रद्धाञ्जली सभा सम्पन्न गरेको छ ।
संस्थाका शेयर सदस्य पार्वतीे कुँवरका ससुरा काठेखोला गाँउपालिका वडा नम्बर ७ रेश निवासी दलबहादुर कुँवरको निधन प्रति दुःख व्यक्त गर्दै श्रद्धाञ्जली सभा सम्पन्न गरेको हो ।
कुँवरको १० औं दिनको पुण्यतिथी पारेर श्रद्धाञ्जली सभासहित परिवारलाई आदर्श सञ्चार सहकारी संस्थाका अध्यक्ष हुमाकुमारी जि.सी, सल्लाहकार तथा निर्वतमान अध्यक्ष अमरबहादुर थापा, सल्लाहकार डिलबहादुर कार्की, निर्वतमान सचिव प्रेमबहादुर जि.सी, शेयर सदस्य तथा नेकपा एमाले बागलुङ जिल्ला अध्यक्ष हिराबहादुर के.सी, शेयर सदस्य भुमिराज शर्मा लगायतले घरमै पुगेर शेयर सदस्यका आफन्तको निधनमा प्रदान गरिने मृत्यु राहत स्वरुप नगद ५ हजार रुपैयाँ स्वर्गीय कुँवरको परिवारलाई हस्तान्तरण गर्नुभएको थियो ।
आदर्श सञ्चार सहकारी संस्थाले सदस्य राहत कोषबाट शेयर सदस्यको निधनमा १५ हजार र शेयर सदस्यका परिवारका सदस्यको निधनमा ५ हजार रकम राहत स्वरुप प्रदान गर्दै आएको छ ।
धौलागिरी अञ्चलकै पहिलो सञ्चार सहकारीको रुपमा स्थापना भएको आदर्श सञ्चार सहकारी संस्था लिमिटेड बागलुङले स्थापनाकालदेखि नै धौलागिरी जागरण दैनिक पत्रिका प्रकाशनसंगै सहप्रकाशन अग्रसर साप्ताहिक, आदर्शसञ्चार अनलाइन, धौलागिरी टेलिभिजनमा सहकार्य गर्नुका साथै वित्तीय तथा सामाजिक क्षेत्रमा समेत काम गर्दै आइरहेको संस्थाका प्रबन्धक दिपकराज सापकोटाले जानकारी दिनुभयो ।
