रोहन जि.सी बागलुङ
जिल्ला स्तरीय एघारौंँ संस्करणको राष्ट्रपति रनिङ शिल्ड खेलकुद प्रतियोगिता अन्र्तगतको कबड्डी खेलको उपाधि बागलुङ नगरपालिका (चिल्ड्रेन लाईफ इङ्लिस बोर्डिङ स्कुल) ले जितेको छ ।
बागलुङको बाङ्गेचौरमा सोमबार सम्पन्न भएको प्रतियोगितामा बागलुङ नगरपालिका (चिल्ड्रेन लाईफ इङ्लिस बोर्डिङ स्कुल)ले बडिगाड गाँउपालिकालाई १७ अंकको फरक पार्दै उपाधि चुमेको हो ।
रनिङ शिल्ड प्रतियोगिता अन्तरगत कबड्डी छात्र तर्फ बागलुङ नगरपालिका (चिल्ड्रेन लाईफ) प्रथम, बडिगाड गाँउपालिका द्धितीय र काठेखोला गाँउपालिका तृतीय भएकोे जिल्ला खेलकुद विकास समितिका भिमसेन शाक्यले जानकारी दिनुभएको छ । कबड्डी खेलमा प्रथम, द्धितीय र तृतीय हुने विद्मालयलाई क्रमशः ट्रफी, मेडल र प्रमाण पत्र वितरण गरिएको छ । आइतबार देखी शुरु भएको प्रतियोगितामा छात्र कबड्डी तर्फ ५ पालिकाको सहभागिता रहेकोे जिल्ला खेलकुद विकास समितिका लोकेन्द्र के.सीले जानकारी दिनुभयो ।
विजेता र उपविजेता पालिकाहरुलाई बागलुङ नगरपालिकाका नगर प्रमुख बसन्त कुमार श्रेष्ठ, जिल्ला खेलकुद विकास समितिका अध्यक्ष कुमार खड्का लगायतले पुरस्कार वितरण गर्नुभएको थियो ।
त्यस्तै एघारौंँ राष्ट्रपति रनिङ शिल्ड प्रतियोगिता–२०७९ मा बागलुङ नगरपालिका प्रथम भएको छ । मंगलबार सम्पन्न खेलहरुमा बागलुङ नगरपालिकाले जिल्लाका अरु नौ वटा स्थानीय तहलाई पछि पार्दै पहिलो स्थान हाँसिल गरेको हो ।