आदर्श अनलाइन, म्याग्दी
म्याग्दीको बेनीमा रहेको लोकदीप बचत तथा ऋण सहकारी संस्था लिमिटेडले संस्थाको स्थापना दिवसको पूर्वसन्ध्यामा माध्यमिक विद्यालय स्तरीय निबन्ध प्रतियोगिता आयोजना गरेको छ ।
बेनी सामुदायिक माध्यमिक विद्यालयमा भएको प्रतियोगितामा म्याग्दीका सात र छिमेकी पर्वत जिल्लाको जलजला गाउँपालिकबाट एक गरी आठ विद्यालयको सहभागिता रहेको थियो । उच्च शिक्षा अध्ययनको लागि बाल बचतको महत्व, समाज रुपान्तरणमा सहकारी, ‘वर्तमानको बचत भविष्यको आधार’ शिर्षकमा निबन्ध लेखन प्रतियाेगिता संचालन गरेकाे संस्थाका अध्यक्ष हरिकृष्ण गौतमले बताउनुभयो ।
सहकारीको १० औँ स्थापना दिवसको अवसर पारेर आयोजना गरिएको सहकारी शिक्षा अन्तरगतको उक्त कार्यक्रमको संयोजकत्व संस्थाका शिक्षा उपसमिति संयोजक खोमराज उपाध्यायले गर्नुभएको थियो । प्रबन्धक नेत्रराज सुबेदीले संस्थाको बारेमा सहभागीलाई जानकारी गराउनुभएको थियो ।
उक्त प्रतियोगितामा प्रथम द्वितीय तृतीय र सान्त्वना हुने विद्यालयलाई आगामी चैत्र १२ गते संस्थाको स्थापना दिवसको दिन औपचारिक कार्यक्रममा पुरस्कार वितरण गरिने संस्थाका प्रबन्धक सुबेदीले जानकारी दिनुभयो । विजेतालाई क्रमशः पाँच हजार, तीन हजार, दुई हजार र सान्तवनालाई एकएक हजार रुपियाँ नगद तथा प्रमाणपत्र उपलब्ध गराइने छ ।