आदर्श अनलाइन, म्याग्दी
जिल्ला भित्र रहेका तीन सय १४ सामुदायिक वन मध्ये उत्कृट कार्य गर्ने तीन वटा सामुदायिक वन उपभोक्ता समितिलाई डिभिजन वन कार्यालय म्याग्दीले पुरस्कृत गरेको छ ।
मंगलबार डिभिजन कार्यालय म्याग्दीले आयोजना गरेको पुरस्कार वितरण एवम् सार्वजनिक सुनुवाई कार्यक्रम आयोजना उत्कृष्ट कार्य गर्ने तीन वटा सामुदायिक वन, एक जना कर्मचारी र एक जना पत्रकारलाई पुरस्कार तथा सम्मान गरीएको थियो ।
कार्यालयले रघुगंगा गाउँपालिका–८ को कृष्ण तालाबन्दी सामुदायिक वनलाई पहिलो, अन्नपूर्ण गाउँपालिका–७ को औल सामुदायिक वनलाई दोश्रो र धवलागिरी गाउँपालिका–३ को छेरपातल सामुदायिक वनलाई तेश्रो पुरस्कार प्रदान गरीएको डिभिजन वन अधिकृत मनोज रानाभाटले बताउनुभयो । प्रथम, द्वितीय र तृतीय हुने सामुदायिक वनलाई दश हजार, सात हजार र पाँच हजार रुपैयाँ नगदसहित दोषल्ला र प्रमाणपत्र प्रदान गरिएको थियो ।
कार्यालयले उत्कृष्ट कार्य गर्ने कर्मचारी तर्फ सव डिभिजन कार्यालय दरवाङका फरेष्टर दिपकबहादुर शेरचन उत्कृष्ट कर्मचारीको रुपमा सम्मान गरेको थियो । पत्रकारिताको माध्यमबाट वन तथा वातावरण क्षेत्रको प्रचारप्रसारमा उत्कृष्ट योगदान गर्नुहुने म्याग्दीका अग्रज पत्रकार घनश्याम खड्कालाई सम्मान गरिएको थियो । नेपाल पत्रकार महासंघ म्याग्दी शाखाका संस्थापक अध्यक्ष एवम् कान्तिपुर मिडियामा कार्यरत पत्रकार खड्कालाई दोसल्ला र प्रंशसापत्र प्रदानगरी सम्मान गरीएको थियो ।
वन कार्यालयले आयोजना गरेको सार्वजनिक सुनुवाई तथा पुरस्कार वितरण कार्यक्रममा जिल्ला समन्वय समितिका म्याग्दीमा प्रमुख राजकुमार थापा, प्रमुख जिल्ला अधिकारी तुलसीराम पौडेल, वन अधिकृत रानाभाटले पुरस्कार तथा सम्मान वितरण गर्नुभएको थियो ।
कार्यालयले गत आर्थिक वर्षको प्रगति विवरण समेत कार्यक्रममा सार्वजनिक गरेको थियो । आर्थिक वर्ष २०७९÷०८० मा वन्यजन्तुको आक्रमणबाट नागरिकले पालेका २८ वटा पशुधनको क्षति भएको थियो । क्षती ब्यहोरेका पशुका मालिकहरुलाई तीन लाख सात हजार रुपैया उपलब्ध गराइएको समेत कार्यक्रममा जानकारी गराईएको थियो ।
कार्यक्रममा जिल्ला समन्वय समितिका प्रमुख राजकुमार थापाले सामुदायिक वनको अतिक्रमण बढेकोले त्यसलाई रोकथाम गर्नु पर्ने बताउनुभयो । उहाँले सार्वजनिक सम्पत्तीको अतिक्रमणलाई निरुत्साहीत गर्नका लागि सबै जिम्मेवार बन्नु पर्ने धारणा राख्नु भयो । वनलाई घाँस र दाउरामा मात्र सिमित भन्दापनि वनलाई पर्यापर्यटनको रुपमा विकास गरेर आम्दानीतर्फ अघि बढाउनुपर्ने उहाँको धारणा थियो ।
प्रमुख जिल्ला अधिकारी पौडेलले सामुदायिक वनको संरक्षणले वातावरणको संरक्षणमा टेवा पु¥याउने बताउदै समुदायको आम्दानीमा बृद्धि हुने किसमिले काम गर्न जोड दिनुभएको थियो । गत वर्ष प्रदेशकै उत्कृष्ट कार्यालयको रुपमा सम्मानित भएको वन कार्यालयले आफ्नो उत्कृष्टतालाई बचाइ राख्ने चुनौती पनि रहेको उहाँको भनाई थियो ।
कुनै समय २६ किलो सम्म यार्सगुम्बा संकलन भएको म्याग्दीमा गत आर्थिक वर्ष आधा केजीका लागि मात्र पुर्जी लिएको कार्यालय प्रमुख रानाभाटले बताउनुभयो । उक्त आर्थिक वर्षमा जडिबुटी संकलन वापत एक लाख चारहजार रुपैयाँ मात्रै राजश्व संकलन भएको छ । आर्थिक वर्ष २०७८÷०७९ मा एक लाख ५९ हजार राजश्व संकलन भएकोमा उक्त रकम घटेर एक लाख चार हजार भएको प्रमुख रानाभाटले बताउनुभयो ।
वन कार्यालयका शाखा अधिकृत नरवहादुर क्षेत्रीको सञ्चालन भएको कार्यक्रममा नेपाली सेना, नेपाल प्रहरी, सामुदायिक वन उपभोक्ता महासंघ म्याग्दी, नागरिक समाजका प्रतिनिधि तथा पत्रकार लगायतको उपस्थिति रहेको थियो ।