आदर्श अनलाइन, बागलुङ
नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को अध्यक्ष पदका लागि संघका वर्तमान अध्यक्ष परितोष पौड्यालले पुनः उम्मेदवार बन्ने घोषणा गर्नु भएको छ । मंगलवार काठमाडौंमा आयोजित एक कार्यक्रम मार्फत पौडेलले आगामी कार्यकालका लागि अध्यक्षमा उमेदवारी घोषणा गर्नु भएको हो ।
पुसका ७ र ८ गते काठमाडौंमा नेफ्स्कुनको ३२ औं वार्षिक साधारणसभा हुदैछ, साधारणसभाले सञ्चालक समिति र लेखा सुपरीवेक्षण समितिको निर्वाचन गर्ने कार्यक्रम रहेको छ ।
उमेदवारी घोषणा कार्यक्रममा नेकपा एमाले केन्द्रीय सहकारी तथा गरिवी निवारण विभागका प्रमुख खगराज अधिकारी, पूर्व प्रमुखहरु केशव बडाल, कमल चौलागाई र धर्मदत्त देवकोटा, राष्ट्रिय सहकारी महासंघका अध्यक्ष मिनराज कडेल, वरिष्ठ उपाध्यक्ष ओमदेवी मल्ल, उपाध्यक्ष रमेश पोखरेल, राष्ट्रिय सहकारी बैंकका अध्यक्ष केबी उप्रेती लगायत सहकारी अभियन्ताहरुको उपस्थिती रहेको थियो ।
नेफ्स्कुनमा आफुहरुले अगाडि बढाएका कामलाई सम्पन्न गर्नका लागि उमेदवारी दिन लागेको अध्यक्ष पदमा उमेदवार घोषणा गरेका पौड्यालले बताउनु भएको थियो । संघको अध्यक्षमा यस अगाडि वरिष्ठ उपाध्यक्ष चन्द्र ढकालले उमेदवारी घोषणा गर्नु भएको छ । ढकालले नेतृत्व हस्तान्तरण गर्नु पर्ने एजेण्डा सहित विगत लामै समयदेखि चुनावी चर्चा चलाउदै आउनु भएको छ ।
नेफ्स्कुनको निर्वाचनका लागि मंसिर ३० गतेसम्म प्रतिनिधि चयन भइसकेको र पौड्यालले प्रतिनिधिको आंकलन पछि उमेदवारी घोषणा गरेको बताउनु भएको थियो ।
नेफ्स्कुनको १९ सदस्यीय सञ्चालक समिति र ३ सदस्यीय लेखा सुपरीवेक्षण समितिको निर्वाचनका लागि देशका विभिन्न क्षेत्रमा क्रियाशिल सहकारीकर्मीहरुले आफ्नो उमेदवारी घोषणा गरेका छन् ।
विगतमा मुख्य पार्टीमा आवद्ध सहकारीकर्मीहरुबीच सहकार्य हुने गरेकोमा यस पटक निर्वाचन हुने आंकलन सहकारीकर्मीहरुले गरेका छन् । अध्यक्षमा परितोष पौड्याल र चन्द्र ढकालका बीच प्रतिस्पर्धा हुने भएपछि अन्य पदहरुमा समेत चुनाव हुन सक्ने देखिएको छ ।
यद्यपी निर्वाचनको दिनसम्म मुख्य राजनीतिक दलमा आवद्ध सहकारीकर्मीहरुबीच सहमतिका लागि छलफल चल्ने जनाइएको छ । सबैलाई मिलाएर लैजानका लागि अध्यक्ष मात्रै घोषणा गरिएको र सबैसंगको सम्वाद र छलफल पछि अन्य उमेदवारको टुंगो लगाइने उमेदवारी घोषणा कार्यक्रममा जानकारी गराइएको थियो ।