आदर्श अनलाइन, काठमाडौं
राष्ट्रिय सहकारी महासंघले काठमाडौंमा आयोजना गरेको प्रथम सहकारी डिजिटल कन्क्लेभ सात बुँदे प्रतिवद्धतापत्र जारी गर्दै शुक्रवार सम्पन्न भएको छ । सहकारीको सेवा सुविधालाई प्रविधिमैत्री बन्न प्रेरित गर्ने लक्ष्यका साथ आयोजना गरिएको सहकारी डिजिटल कन्क्लेभमा उपस्थित देशभरका २ सयभन्दा बढी सहकारीकर्मी, सरकारी निकाय, प्रविधि प्रदायक र सरोकारवालाहरुले सात बुँदे साझा प्रतिवद्धतापत्र जारी गरेका हुन् ।
सहकारीका मूल्य, मान्यता र सिद्धान्तको पूर्ण पालनाका साथ डिजिटलाइजेसनमार्फत नेपालको सामाजिक–आर्थिक विकासमा सकारात्मक परिवर्तन गर्दै डिजिटल नेपालको भिजनलाई साकार पार्न सामूहिक रूपमा सात बुँदे प्रतिवद्धता जारी गरिएको महासंघका अध्यक्ष ओमदेवी मल्लले जानकारी दिनुभयो ।
दुईदिन सम्म विभिन्न क्षेत्रका विषय विज्ञहरुको प्रस्तुती, छलफल र सुझाव लिनुका साथै कार्यक्षेत्रमा हुने गरेका सकारात्मक विषय र समस्याहरुलाई समेत मध्यनजर गरी साझा प्रतिवद्धता जारी गरेका छौ, अध्यक्ष मल्लले भन्नुभयो,– सहकारीलाई प्रतिस्पर्धात्मक बनाउदै सेवालाई सहज र प्रभावकारी बनाउन तथा सहकारीको गुणस्तर वृद्धि र सुशासन कायम गर्नका लागि प्रविधिको प्रयोग अपरिहार्य रहेकोछ ।
सहकारी कार्यस्थललाई २०३० सम्ममा पूर्ण गुणस्तरीय डिजिटलाईजेशनमा रुपान्तरण गर्न कार्यक्रममा सहभागीहरुले प्रतिवद्धता जनाएका छन् । त्यस्तै सहकारी संरचनाहरू भित्र बलियो साइबर सुरक्षा उपायहरू स्थापना गर्न, संवेदनशील डाटाको सुरक्षा गर्न र सदस्य तथा सरोकारवालाको विश्वास सुनिश्चित हुने वातावरण निर्माणलाई पहिलो प्राथमिकतामा राख्ने सहकारीकर्मीहरु प्रतिवद्धता जनाएका छन् । सहकारीका सदस्य तथा सरोकारवालाहरूलाई डिजिटल रूपान्तरण प्रक्रियामा सक्रिय रूपमा सहभागी हुन, अध्ययन अनुसन्धानमार्फत नविनता प्रदान गर्न, सहकार्य र साझा स्वामित्व र एकरुपता निर्माणको संस्कृतिलाई बढावा दिँदै डिजिटलाइजेसन रणनीतिको निरन्तर कार्यान्वयन, मूल्यांकन र अनुकुलन बनाउन साझा प्रतिबद्धता जनाएका छन् ।
सहकारी सहकारी डिजिटल कन्क्लेभको समापन समारोहमा बोल्दै महासंघका पूर्व अध्यक्ष केशव बडालले सहकारीको मुल मर्म र भावनालाई संस्थागत गर्न, आम समुदायको हितमा सहकारीलाई केन्द्रीत गर्नका लागि सहकारीलाई प्रविधिमा लैजान जरुरी रहेको र महासंघले त्यसको अगुवाई गरेको बताउनुभयो ।
समापन कार्यक्रममा राष्ट्रिय सहकारी बैंकका सञ्चालक तथा गण्डकी प्रदेशका संयोजक राम बहादुर जिसीले सहकारी क्षेत्रमा प्रविधिका उच्चतम प्रयोग गर्ने, प्रविधिसंग भर्खर जोडिएका र प्रविधिसंग जोडिन नसकेका सहकारीको पहिचान गरी सबै सहकारीलाई प्रविधिमार्फत सेवा सुविधा दिने वातावरण बनाउन कार्यक्रमले सहयोग गर्ने धारणा राख्नु भएको थियो ।
महासंघका अध्यक्ष ओमदेवी मल्लको अध्यक्षतामा भएको समापन कार्यक्रममा उपाध्यक्ष डिबी बस्नेतले प्रतिवद्धता पत्र प्रस्तुत गर्नु भएको थियो । उपाध्यक्ष इन्दिरा पन्तले धन्यवाद ज्ञापन गर्नु भएको कार्यक्रमको सञ्चालन महासंघका सञ्चालक टेक प्रसाद चौलागाईले गर्नु भएको थियो । प्रथम सहकारी डिजिटल कन्क्लेभको उद्घाटन कानुन, न्याय तथा संघीय मामिला मन्त्री पदम गिरीले गर्नु भएको थियो ।
प्रथम सहकारी डिजिटल कन्क्लेभबाट जारी सात बुँदे
प्रतिवद्धतापत्र– २०८०
राष्ट्रिय सहकारी महासंघ लि. नेपालको आयोजनामा काठमाडौंमा मिति २०८० चैत १ र २ गते ‘डिजिटाइजिङ्ग को–अपरेटिभः अटेनिङ्ग भिजन २०३०’ थिमका साथ सम्पन्न प्रथम सहकारी डिजिटल कन्क्लेभमा उपस्थित हामी सहकारीकर्मी, सरकारी निकाय, प्रविधि प्रदायक र सरोकारवालाहरु यो प्रतिवद्धतापत्र–२०८० जारी गर्दछौं । सहकारीका मूल्य, मान्यता र सिद्धान्तको पूर्ण पालनाका साथ डिजिटलाइजेसनमार्फत नेपालको सामाजिक–आर्थिक विकासमा सकारात्मक परिवर्तन गर्दै डिजिटल नेपालको भिजनलाई साकार पार्न हामी सामूहिक रूपमा यो प्रतिवद्धता जारी गर्दछौं ।
१) डिजिटलाइजेसन प्रति प्रतिबद्ध ः दक्षता, पारदर्शिता र समावेशीतालाई आत्मसाथ गर्दै सहकारी कार्यस्थललाई २०३० सम्ममा पूर्ण गुणस्तरीय डिजिटलाईजेशनमा रुपान्तरण गर्न हामी प्रतिबद्ध छौं ।
२) नीति वकालत ः सहकारी डिजिटलाईजेशन र नविनताका लागि अनुकुल वातावरण निर्माण गर्न हामी राष्ट्रिय स्तरमा सूचना, संचार र प्रविधि (आईसीटी) नीतिहरूको विकास र कार्यान्वयनको लागि वकालत गर्न प्रतिबद्ध छौं ।
३) सीप आदानप्रदान र क्षमता विकास ः सदस्य र नेतृत्वलाई डिजिटल साक्षरतामार्फत आवश्यक सीप र स्रोतहरूबाट सुसज्जित गरी समुदायहरूमा सहकारी डिजिटलाइजेशनसँग सम्बन्धित ज्ञान र उत्कृष्ट अभ्यासहरू आदानप्रदान गर्न प्रतिबद्ध छौं ।
४) साइबर सुरक्षा ः सहकारी संरचनाहरू भित्र बलियो साइबर सुरक्षा उपायहरू स्थापना गर्न, संवेदनशील डाटाको सुरक्षा गर्न र सदस्य तथा सरोकारवालाको विश्वास सुनिश्चित हुने वातावरण निर्माणलाई पहिलो प्राथमिकतामा राख्न प्रतिवद्ध छौं ।
५) सहयोग र साझेदारी ः सहकारीमा डिजिटल रुपान्तरणको गतिलाई तिव्र बनाउन सरकारी निकाय, प्रविधि प्रदायक र सरोकारवाला निकायहरुबीचसँग सहयोगात्मक साझेदारीलाई अभिबृद्धि गरी पारदर्शिता र जवाफदेहितामार्फत स्वनियमन र सुशासनलाई मजबुद बनाउन प्रतिबद्ध छौं ।
६) सशक्तिकरण र निरन्तर सुधार ः सदस्य तथा सरोकारवालाहरूलाई डिजिटल रूपान्तरण प्रक्रियामा सक्रिय रूपमा सहभागी हुन, अध्ययन अनुसन्धानमार्फत नविनता प्रदान गर्न, सहकार्य र साझा स्वामित्व र एकरुपता निर्माणको संस्कृतिलाई बढावा दिँदै डिजिटलाइजेसन रणनीतिको निरन्तर कार्यान्वयन, मूल्यांकन र अनुकुलन बनाउन प्रतिबद्ध छौं ।
७) समावेशी र दिगो विकास ः अभियानको इकोसिस्टमभित्र समावेशीता, लैङ्गिक समानता, युवा उत्प्रेरणा र वातावरणीय दिगोपनका विषयलाई प्राथमिकतामा राखी सहकारी डिजिटलाइजेसनमार्फत प्राप्त हुने लाभलाई समानुपातिक रूपमा सदस्यहरुमा वितरण गर्न प्रतिबद्ध छौं ।
२०८० चैत्र २ गते, काठमाडौं ।
