आदर्श अनलाइन, बागलुङ
बागलुङ नगरपालिका वडा नम्बर १ बाङेचौर खेल मैदानमा जारी प्रथम आदर्श कप फुटबल प्रतियोगितामा पहिलो चरण खेल सकिएको छ ।
सोमबार न्यु एभेरेष्ट एकेडेमीमाथि हाबी बन्दै ०–६ गोलको सानदार जित निकालेपछि पर्वत आवासीय माध्यमिक विद्यालय क्वाटरफाइनल प्रवेश गरेको छ ।
खेलको १० औं मिनेटमा गोल गर्दै पाहुना टोली पर्वतलाई शुरुवाती अग्रता दिएका अफरोज अलीले २७ औं मिनेटमा दोस्रो गोल थपे । न्यु एभरेष्टलाई निराश बनाउन अलीले ४ गोलको योगदान गर्दा नविन काफ्ले ३३ औं र दिवान थापाले ४६ औं मिनेटमा एक÷एक गोल गरेका थिए ।
पर्वत मा.विले मंगलबार हुने फ्युचर ब्राइटर आवासीय मा.वि विरुद्वको क्वाटरफाइनल खेल खेल्ने छ । यता सोमबार सम्पन्न दोस्रो खेलमा फ्युचर ब्राइटर आवासीय मा.विले सनराइज आवासिय माविलाई ४–० गोलले स्तब्ध पार्दे क्वाटरफाइनलमा प्रवेश गरेको हो । फ्युचरका लागि अमृत शर्माले २ गोलको योगदान गर्दा निशान कार्की र आदित परियारले एक÷एक गोल गरेका थिए ।
सोमबारै सम्पन्न खेलमा सिद्वार्थ शिक्षा सदन र आयोजक आदर्श विद्यामन्दिर मावि ‘सेतो’ विजयी भएका छन् । निकै प्रतिष्पर्धात्मक खेलमा रुद्रेपिपल माविमाथि ०–१ गोलको कठिन जित निकाल्दा सिद्वार्थका सचिन रावलले खेलको इन्जुरी समयमा गरेको गोल नै निर्णायक गोल बन्यो । सिद्वार्थले मंगलबार हुने क्वाटरफाइनलको खेलमा अमर आदर्श माविको सामना गर्ने छ ।
न्यू ओयसिस एकेडेमी ट्राईबेकरमा अभागी बन्दा आयोजक आदर्श विद्यामन्दिर मावि ‘सेतो’ क्वाटरफाइनलमा पुगेको छ । सोमबारको अन्तिम खेल निर्धारित समय गोलरहित बराबरी भएपछि ट्राइबेकरमा धकेलिएको थियो । ट्राइबेकरमा आदर्श विद्यामन्दिरका गोलरक्षक नायक बन्दा जित उसको सुनिश्चित भएको हो । आदर्श १–४ गोल अन्तरले विजय भयो । आदर्श ‘सेतो’ले मंगलबार हुने खेलमा विद्यामन्दिर माविसंग प्रतिष्पर्धा गर्ने छ ।
