आदर्श अनलाइन, बागलुङ
मंगलबार दिउँसो पहिरोमा परी घाइते भएका बडिगाड गाउँपालिका वडा न। १० का ७८ बर्षीय जोग बहादुर बुढा मगरको मृत्यु भएको छ । समयमै उपचार पाउन नसक्दा बुढाको मृत्यु भएको हो ।
उपचारकोलागि हेलिकप्टर मार्फत काठमाण्डौ लैजाने पर्खाईमा रहेका उहाँको उपचारमा ढिलाई हुँदा मृत्यु भएको हो । खराब मौषमका कारण हेलिकप्टर आउन नसक्दा घाइतेहरुलाई समयमै उपचार पाउन सकेका छैनन् । बुढाको ढाड र टाउकोमा गम्भिर चोट लागेको प्रहरीको भनाई छ ।
घाइतेहरुलाई ल्याउन आएको हेलिकप्टर खराब मौषमका कारण बडिगाड जान नसकी बागलुङ सदरमुकाममा रहेको नेपाली सेनाको २३ न। बाहिनीमा अवतरण गरेको थियो ।
बुढासँगै बडिगाडमा भएको बाढी र पहिरोमा परि मृत्यु हुनेको संख्या ८ पुगेको छ । घाइतेहरुको प्राथमिक उपचार पछि थप उपचारकोलागि बुर्तिबाङ प्राथमिक स्वास्थ्य केन्द्र तर्फ लगिएको छ ।