आदर्श अनलाइन, म्याग्दी
काठमाडौंमा सम्पन्न एमालेसम्बद्ध निर्माण व्यवसायीहरुको छाता सङ्गठन नेपाल निर्माण उद्योग परिषदको पाँचौं साधारणसभा तथा तेस्रो अधिवेशनबाट म्याग्दीका व्यवसायी नारायण जिसी उपाध्यक्ष निर्वाचित हुनुभएको छ ।
साधारणसभा तथा अधिवेशनले नेपाल निर्माण उद्योग परिषदको केन्द्रीय अध्यक्षमा दाङका बलिभद्र राना र खुल्ला उपाध्यक्षमा सुरेन्द्र पाठक चयन भएका हुनुभएको छ । प्रदेश उपाध्यक्षतर्फ गण्डकीमा म्याग्दीका जिसीसँगै कोशी प्रदेशको उपाध्यक्षमा कमल गौतम, मधेशमा राम सुरत देव, बागमतीमा नारायण बडाल, लुम्बिनीमा प्रकाश शाह, कर्णालीमा लक्ष्मण प्रकाश पोखरेल र सुदुरपश्चिम प्रदेशको उपाध्यक्षमा कृष्णबहादुर साउद चयन हुनुभएको छ ।
यसअघि परिषदको केन्द्रीय सदस्य रहनुभएका जिसी हालै भएको साधारणसभा तथा अधिवेशनबाट उपाध्यक्ष निर्वाचित हुनुभएको परिषदले जनाएको छ । म्याग्दीको एक मात्र क्रसर व्यवसायी जिसीले दुई कार्यकाल निर्माण व्यवसायी संघ म्याग्दीको नेतृत्व गरिसक्नु भएको छ ।
नेकपा एमाले बेनी नगरपालिका कमिटीको निवर्तमान अध्यक्ष समेत रहनुभएका जिसीले अहिले पार्टीको जिल्ला कमिटी सचिवालय सदस्य एवं युवा फाँट इन्चार्जको जिम्मेवारीमा हुनुहुन्छ ।