आदर्श अनलाइन, म्याग्दी
हिमाली जिल्ला म्याग्दीको बेनी नगरपालिका–८ को नेटेचौर चोकमा बिहानै देखि ह्वीलचियरमा बसेर ग्राहको प्रतिक्षा गर्नुहुन्छ ४७ वर्षिय अमरबहादुर दमैले । बेनी नगरपालिका–३ भकिम्लि स्थायी बसोबास रहेका उहाँलाई हरेक दिन पत्नी जुनाले त्यहाँ सम्म ल्याएर राख्ने गर्नुहुन्छ । फलफूलहरु खोजेर ल्याइदिए पछि नगरपालिकामा सरसफाइका लागि जुना जानुहुन्छ भने अमरले दिनभर स्याउ तथा अन्य सिजनल फलफूल बेच्दै बस्नु हुन्छ । हरेक दिन आफ्नो श्रीमतीले त्यस स्थान सम्म सामानहरु र आफूलाइ ल्याएर छाड्ने र आफूले दिनभर ब्यापार गर्ने अमरबहादुरको भनाइ छ ।
सन २००७ मा बैदेशिक रोजगारीका लागि संयुक्त अरब इमरेस्ट पुग्नु भएका अमरले ७ वर्ष वैदेशीक रोजगारी पछि छुट्टीमा नेपाल आएको समयमा एक्कासी रक्तचापको समस्याले च्यापेपछि प्यारालाइसेस भएको थियो । प्यारालाइसेस भए पछि शरिरको ढाड भन्दा मुनीको भाग नचल्ने समस्या भए पछि संघै ह्वीलचियरकै साहारामा हिड्न पर्ने बाध्यता भएको छ । प्यारालाईसेस भए पछि बेनी ह्वीलचियरको साहारामा हिड्नु पर्ने बाध्यतामा पुग्नुभएका उहाँले मासिक रुपमा १० हजार रुपियाँ भन्दा बढीको औषधि प्रयोग गर्नु पर्ने बाध्यता रहेको उहाँकी श्रीमती जुना नेपाली बताउनुहुन्छ ।
स्वास्थ्य परीक्षणको छुट्टै र औषधिको पनि थप पैसा तिर्न पर्ने अवस्थाले गर्दा बिमाले नपुग्ने र औषधिहरु बिमामा कतिपय नपाउने हुनाले पनि औषधि जोहो गर्न मुस्कील भएको छ । स्वास्थ्य बिमा तथामा कतिपय औषधि नआउने हुँदा नियमित रुपमा फलफूल ब्यापार गरेर औषधिको लागि रकम जम्मा गर्नु पर्ने बाध्यता बन्न पुगेको छ । झण्डै छ देखि सात हजार रुपियाँ हाराहारीको औषधि स्वास्थ्य बिमाबाट निःशुल्क पाए पनि बाँकी औषधिका लागि रकम जोहो गर्नुनै पर्ने भएकाले फलफूल ब्यापार गर्नु परेको उहाँले बताउनुभयो ।
तीन छोरी र एक छोरा तथा श्रीमतीहरु रहेका अमरको जेठी जोरिको विवाह भै सकेको छ भने माइली छोरी भकिम्लि घरमै छिन् भने कान्छी छोरीले बेनीको प्रकाश माध्यमिक विद्यालयमा अध्ययन गर्दै छिन् । छोराले बेनीमै सानो तीनो सहयोगीको काम गर्ने र श्रीमतीले नगरपालिकामा सरसफाइको काम गरेर घरखर्च तथा औषधि खर्च जोहो गर्न नपुग्ने भएकाले नै ह्वीलचियरमै भए पनि आफ्नो औषधिका लागि आफै सानोतीनो ब्यापार गरेको उहाँको कथन छ ।
पुख्र्यौलि गाउँ भकिम्लि भए पनि आफ्नो बस्ने घर भन्दा अन्य जग्गा जमिन नहुँदा काम पाउने र उपचारका लागि केही सहज होला भन्ने सोचेर बजार झरेको उहाँले बताउनुभयो ।