आदर्श अनलाइन, बागलुङ
बीबीसीले सन् २०२४ का लागि विश्वभरबाट सार्वजनिक गरेको एक सय प्रेरक र प्रभावशाली महिलाको सूचीमा नेपालकी शिलशिला आचार्य पनि समेटिनुभएको छ ।
नेपालकी दिगो विकास उद्यमी शिलशिला आचार्य जलवायु अभियानअन्तर्गत सय प्रभावशाली महिलाको सूचीमा समेटिनुभएको हो ।
शिलशिला आचार्य नेपालमा लामो समयदेखि पर्यावरणीय क्षेत्रमा सक्रिय उद्यमी रहनुभएको बीबीसीले उल्लेख गरेको छ । उहाँ नेपालमा प्लास्टिकको पुनः प्रयोगसम्बन्धी सबैभन्दा ठूलो सञ्जाल चलाउनुहुन्छ ।
उहाँले सञ्चालन गर्दै आउनुभएको फोहोर व्यवस्थापनसम्बन्धी अभनी भेन्चर्स नामको संस्थाले सीमान्त समुदायका व्यक्तिलाई रोजगारीमा प्राथमिकता दिँदै आएको छ । साथै हरित क्षेत्रमा थप महिलालाई प्रोत्साहित गर्न ध्यान केन्द्रित गरेको समेत बीबीसीले उल्लेख गरेको छ ।
शिलशिलाले सन् २०१४ मा ’धन्यवाद, म आफैं झोला बोक्छु’ भन्ने अभियान सञ्चालनमा नेतृत्वदायी भूमिका निर्वाह गर्नुभएको थियो । जसले किनमेलमा प्लास्टिक झोलाको प्रयोगमा प्रतिबन्ध लगाउन प्रेरित गरेको थियो । शिलशिला हिमाल सफा गर्ने अभियानमा समेत जोडिनुभएको थियो ।
बीबीसीले जलवायु अभियान, संस्कृति तथा शिक्षा, मनोरञ्जन एवम् खेल, राजनीति र विज्ञान, स्वास्थ्य एवम् प्रविधि क्षेत्रका महिलालाई समेटेर विश्वभरबाट प्रभावशाली एक सय महिलाको सूची तयार पारेको जनाएको छ ।
बीबीसीको सूचीमा नोबेल शान्ति पुरस्कार विजेता नादिया मुराददेखि न्युजिल्यान्डकी आदिवासी सांसद हाना–रावहिती मइपी–क्लार्कसम्म छन् ।
त्यस्तै भारतमा बेवारिसे शवहरूको अन्तिम संस्कार गराउन सक्रिय पूजा शर्मा, सामाजिक कार्यकर्ता अरुणा रोय र कुस्ती खेलाडी विनेश फोगाट पनि बीबीसीको प्रेरक र प्रभावशाली महिलाको सूचीमा रहेका छन् ।
शिलशिला आचार्य गत वर्ष ८ मार्चमा अनलाइनखबरले सार्वजनिक गरेको नेपालका ५० प्रभावशाली महिलाको सूचीमा पनि परेको शिलशिलाका बाबु राजेन्द्र आचार्य बताउनुभयो ।
बागलुङ नगरपालिका–१ रामरेखामा विसं २०४३ असारमा बुबा राजेन्द्र आचार्य र मुमा इन्दु केसी आचार्यको जेठी छोरी रुपमा जन्मिएकी थिइन् ।
म्याग्दी जिल्लाको बेनी बोर्डिङ स्कुलबाट विसं २०५८ सालमा एसएलसी दिएकी आचार्यले विसं २०६२ सालमा काठमाडौं विश्व विद्यालय धुलिखेलबाट वातावरण विज्ञानमा स्नातक तह उर्तीण गरेकी थिइन् । उनले नर्वेजियन सरकारको छात्रवृत्तीमा त्रिभुवन विश्वविद्यालय र नर्वेबाट बायो डाइभरसिटि एण्ड म्यानेजमेन्ट विषयमा स्नातकोत्तर तह उर्तीण गरेकी थिइन् ।
