आदर्श अनलाइन, म्याग्दी
म्याग्दीको बेनी नगरपालिका–९ गलेश्वरमा रहेको जेष्ठ नगारिक आश्रमलाई जिन्सी सामग्रीहरु सहयोग प्रदान गरिएको छ ।
आफ्ना ससुराको जन्मदिनको अवसर पारेर गौमायाँ गर्बुजाले गलेश्वरधाम जेष्ठनागरिक आश्रमलाई आवश्यक पर्ने दैनिक उपभोग्य सामग्रीहरु प्रदान गर्नुभएको हो । आश्रममा प्रयोग हुने चामल, तेल, चिनि, लुगा धुने सरफ, चियापत्ती लगायतका सामग्री प्रदान गरिएको संस्थाले जनाएको छ ।
गलेश्वरधाम जेष्ठ नागरिक आश्रमकी कोषाध्यक्ष समेत रहनुभएकी गर्बुजाले आफ्नो ससुराको जन्मदिन पारेर २५ हजार पाँच सय ५५ रुपियाँ बराबरको सामग्री हस्तान्तरण गर्नुभएको आश्रमका अध्यक्ष बमबादुर पुनले जानकारी दिनुभयो । पुनका अनुसार आश्रमका लागि आवश्यक पर्ने विभिन्न ९ प्रकारका सामानहरु पुस १७ गते आफ्नो ससुराको जन्मदिनकै दिनमा हस्तान्तरण गरिएको हो ।