रोहन जि.सी, बागलुङ
जाडोको याममा जिल्लामा रगतको अभाव हुन नदिन बागलुङ एकता क्लब बागलुङको आयोजनामा रक्तदान कार्यक्रम बिहीबार सम्पन्न भएको छ ।
नेपाल रेडक्रस सोसाइटी जिल्ला शाखा बागलुङको प्राविधिक सहयोगमा आयोजित रक्तदान कार्यक्रममा १५ पिन्ट रगत सङ्कलन भएको क्लबका सचिव रमेश भण्डारीले बताउनुभयो ।
उहाँले रक्तदान कार्यक्रममा रगत दिनेहरुको ठुलो उत्साह देखिएको जनाउँदै समाजमा सचेतना दिन सकिए अझै धेरै रगत सङ्कलन हुन सक्ने देखिएको बताउनुभयो ।
रक्तदान कार्यक्रमबाट आफुहरु निकै उत्साहित भएको जनाउँदै यसलाई निरन्तरता दिने योजना बनाइरहेको स्थानिय विश्वास थापाले बताउनुभयो ।
मानवको जीवन रक्षा तथा सामाजिक उत्तरदायित्वको भावनाका लागि यो अभियान सुरु गरिएको जनाउँदै समुदायमा रगत दिनुपर्ने सचेतना अभिवृद्धिका लागि पनि रक्तदान कार्यक्रम गरिएको बागलुङ एकता क्लबका अध्यक्ष इन्सान थापाले बताउनुभयो ।
समाजमा रक्तदान गर्ने जागरुकता अभिवृद्धिका लागि रक्तदान कार्यक्रमलाई निरन्तरता दिने बागलुङ एकता क्लब बागलुङले जनाएको छ ।
त्यस्तै बागलुङ एकता क्लबको आयोजनामा खेलकुदको पहिचान, एकताको अभियान भन्ने मूल नाराका साथ दोस्रो स्मृति कप फुटबल प्रतियोगिता २०८१ हुन गईरहेको छ ।
पौष २९ देखी माघ ५ गतेसम्म सञ्चालन हुने प्रतियोगितामा विजेता टोलीले १ लाख २२ हजार २२२, ट्रफी, मेडल र प्रमाणपत्र तथा उपविजेता हुने टोलीले ६६ हजार ६६६, ट्रफी, मेडल र प्रमाणपत्र साथै विभिन्न विधागत पुरस्कार रहेको कार्यक्रम संयोजक साहिल खड्काले जानकारी दिनुभयो ।
उक्त प्रतियोगिता बागलुङ नगरपालिका वडा नम्बर १ बाङ्गेचौर खेल मैदानमा हुने आयोजकले जनाएको छ ।
