आदर्श अनलाइन, दोहा
नेपाल मगर संघ शाखा कतारको आयोजनामा मगरहरुको प्रमुख राष्ट्रिय चाड ‘माध्या सकराटी’ मनाईने भएको छ ।
‘सम्पूर्ण मगरहरूको एकता अहिलेको आवश्यकता’भन्ने मूल नाराका साथ (मिनाम ल्हेस् ५०१८– २०२५ को अवसरमा बनभोज सहित विभिन्न साँस्कृतीक कार्यक्रमको आयोजना गरेर माध्या सकराटी मनाउन लागिएको हो ।
अबु हमुर स्थित आइडिएल इन्डिएन स्कुलमा १७ जनवरीमा कार्यक्रम हुने नेपाल मगर संघ कतारका अध्यक्ष रेशम आले मगरले जानकारी दिनुभयो । कार्यक्रममा प्रस्तुति दिन नेपालबाट चर्चित लोक तथा दोहोरी गायिका सम्झना लामिछने मगर आउने आयोजकले जनाएको छ ।
गायिका लामिछानेका मञ्जुरी, बैना रुमाल, फुल फुलेर पहेलै, बनैमा फुल बसायो, तिम्रो सम्झना जस्ता हिट गितहरु चर्चित छन् । कार्यक्रममा नेपाल मगर साँस्कृतिक परिवारका कलाकारहरुको प्रस्तुति, सालैजो, कौराह, सोरठी, झ्याउरे, हुर्रा, भुम्यासँगै कतारमा रहेका अन्य स्थानीय कलाकारको समेत सांगीतिक प्रस्तुति रहने कार्यक्रम संयोजक कुमार राहादी मगरले बताउनु भयो ।
कार्यक्रमले नेपाल आदिवासी जनजाती महासंघ कतारको मातहतमा रहेका विभिन्न मातृ संस्थाहरुको जातियता झल्काउने सामुहिक नृत्यसंगै आदिवासी जनजातीको कला संस्कृति भाषा पहिचान, जनजाती बिचको सम्बन्धलाई थप समधुर प्रगाढ बनाउन महत्वपूर्ण भुमिका रहने कार्यक्रमका सह–संयोजक गंगा बुढा मगरले बताउनु भयो ।
कार्यक्रममा सहभागि हुन इच्छुकका लागि आयोजकले कतारका विभिन्न स्थलहरुबाट निशुल्क यातायातको व्यवस्था गरेको छ ।
यातयातको सहजीकरणको लागी यातयात संयोजक मोतिलाल बुढा मगर ३०१३९०८७ र सह संयोजक नेत्र थापा मगर ३३८५८५६५ मा सम्पर्क गर्न सकिने आयोजकले जनायो ।
