आदर्श सञ्चार, बागलुङ
६८ औं राष्ट्रिय सहकारी दिवसको अवसर पारेर महिला हित वचत तथा ऋण सहकारी संस्था लिमिटेड, बागलुङले मंगलवार संस्थाले सञ्चालन गरेको हिजो, आज र भोली विषयक एक दिने अन्तरक्रिया कार्यक्रम सम्पन्न गरेको छ ।
कार्यक्रममा राष्ट्रिय सहकारी महासंघका सञ्चालक तथा जिल्ला सहकारी संघ बागलुङका अध्यक्ष हुमा कुमारी जि.सी.(अञ्जु) ले सहकारी दिवसलाई आम शेयर सदस्यहरुलाई सकारात्मक सन्देश दिने गरी मनाउनु पर्नेमा जोड दिनुभयो ।सहकारी सदस्यहरुको हो, सदस्यहरुलाई संस्थाका गतिविधि जानकारी गराउने, समन्वय गर्ने र सहकार्य मार्फत अगाडि बढ्दा सहकारीलाई थप प्रभावकारी बनाउन सकिने उहाँले बताउनुभयो ।
कार्यक्रममा संस्थाका सल्लाहकारहरु मन कुमारी केसी, लक्ष्मी बाँस्कोटा र शान्ति ज्ञवालीले सहकारीलाई समुदायको विकासका लागि थप प्रभावकारी बनाउनु पर्नेमा जोड दिनुभएको थियो ।
कार्यक्रममा हालै सम्पन्न बागलुङ उद्योग वाणिज्य संघको अधिवेशनबाट सदस्यमा निर्वाचित महिला हित सहकारीका शेयर सदस्यहरु कमला पराजुली, सिर्जना श्रेष्ठ राजभण्डारी र सविता आचार्यलाई वधाई तथा शुभकामना व्यक्त गरिएको थियो । संस्थाका तर्फबाट अध्यक्ष लिलादेवी खड्का सहित पदाधिकारीहरुले नवनिर्वाचित संघका सदस्यहरुलाई वधाई ज्ञापन गर्नु भएको थियो ।
कार्यक्रम संस्थाका अध्यक्ष लिलादेवी खड्काको अध्यक्षता, सचिव सावित्री केसीको सञ्चालन र कोषाध्यक्ष पम्फा किसानको स्वागतमा सम्पन्न भएको थियो ।
महिला हित सहकारी संस्थाले सञ्चालन गरेको हिजो, आज र भोली विषयक अभियानका बारेमा संस्थाका ऋण अधिकृत निशा कुवरले जानकारी गराउनु भएको थियो ।