आदर्श सञ्चार, बागलुङ
काठेखोला गाउँपालिकाका प्रमुख प्रशासकीय अधिकृत चूर्ण बहादुर कार्कीलाई पालिकाको समृद्धिका लागि सहकारीमार्फत स्थानीय उत्पादन संकलन र बजारीकरणका लागि पालिका अग्रसर भएको बबताउनु भएको छ ।
६८ औं राष्ट्रिय सहकारी दिवसका अवसरमा बुधवार विहुमा आयोजित अन्तरक्रिया कार्यक्रममा प्रमुख प्रशासकीय अधिकृत कार्कीले पालिकाले हेफर नेपालसंगको सहकार्यमा सहकारीमार्फत स्थानीय उत्पादन संकलन र बजारीकरणमा केन्द्रीत हुन थालेको जानकारी गराउनु भएको हो ।
गाउँको विकासका लागि उत्पादन बढाउने, उत्पादित वस्तुको प्रभावकारी संकलन र बजारीकरण नै हो, उत्पादन गर्ने तर बजारीकरणको अभावमा उत्पादन क्षेत्रमा सक्रिय जनशक्ति कम हुदै गएको चर्चा गर्दै कार्कीले भन्नुभयो,–‘काठेखोला गाउपालिका हेफर नेपालसंगको समन्वय र सहकारीहरुको सक्रियतामा स्थानीय उत्पादन संकलन र बजारीकरणमा केन्द्रीत हुदैछ ।’
काठेखोलाका सहकारीहरुले दुध, तरकारी, फलफूल, कफि, खसी बोका लगायतका उत्पादन गर्दै आएका छन् । गाउँपालिकाले छिटै कृषकको उत्पादन संकलनका लागि व्यवस्थापन गर्न लागेको र संकलनसंगै बजारीकरणमा समेत अगाडि बढिने कार्कीले जानकारी दिनुभयो ।
काठेखोला गाउपालिका र हेफर नेपालको आर्थिक तथा प्राविधिक सहयोगमा भीमापोखरा युवा क्लव (विवाइसी) बागलुङको सहजीकरणमा काठेखोला गाउँपालिकामा सञ्चालित कृषि तथा पशु विकासमा आधारित युवा उद्यमशिलत विकास कार्यक्रम अन्तरगत स्थानीय उत्पादन संकलन केन्द्र बनाउने तयारी भएको पालिकाले जनाएको छ ।
सोही कार्यक्रम अन्तरगत काठेखोला गाउँपालिकामा रहेका सहकारीहरुबीच अन्तरक्रिया कार्यक्रम सम्पन्न भएको हो । ६८ औं राष्ट्रिय सहकारी दिवसको अवसर पारेर आयोजित अन्तरक्रियामा काठेखोला गाउँपालिका सहकारी शाखाका प्रमुख प्रकाश पौडेल, विवाइसीका हेफर कार्यक्रम संयोजक चुडामणी उपाध्याय र सिनियर बजार सहजकर्ता रिता शर्माले सहजीकरण तथा सञ्चालन गर्नु भएको थियो ।
कार्यक्रममा काठेखोला गाउँपालिका वडा नं. १ का वडा अध्यक्ष खड्क थापाले शुभकामना मन्तव्य व्यक्त गर्नु भएको थियो ।
कार्यक्रम वडा नं. ६ का वडा अध्यक्ष तथा सहकारी विकास समितिका संयोजक वृहस्पती कंडेलको अध्यक्षता र वडा नं. ४ का वडा अध्यक्ष तथा आर्थिक विकास समितिका संयोजक लक्ष्मण थापाको स्वागतमा सम्पन्न भएको थियो ।
कार्यक्रममा काठेखोला गाउँपालिकाम क्रियाशिल सहकारी संस्थाका पदाधिकारी तथा सदस्यहरुको सहभागिता रहेको थियो ।