अमृत बास्कुने, म्याग्दी
पहिलो सम्झौता मिति सकिएको दुई वर्ष पुग्नै लाग्दा पनि गाउँपालिका स्तरीय पाँच शैयाको अस्पताल भवन निर्माणको काम सकिने टुंगो नै छैन । म्याग्दीको धवलागिरी गाउँपालिकाको ताकममा निर्माणाधिन अस्पताल दोश्रो पटक थपिएको समयमा पनि निर्माण सम्पन्न हुनेमा संका देखिएको छ ।
नेपाल सरकारले सबै स्थानीयतहमा अस्पताल बनाउने कार्ययोजना अनुरुप थालिएको ताकम म्याग्दीको निर्माणधिन अस्पताल भवन हालसम्म ६५ प्रतिशत मात्रै भौतिक प्रगती देखिएको छ । गाउँपालिकाका प्रमुख प्रशासकीय अधिकृत मोतिप्रसाद अर्यालका अनुसार छ करोड ७१ लाख ५७ हजार दुई सय ६९ रुपैयाँ लागत स्टमेट गरेर टेण्डर आह्वान गरिएको थियो ।
उक्त भवन निर्माणका लागि बागलुङको ढोरपाटन नगरपालिका बुर्तिबाङको बिएम–आइएस–एसी जेभी निर्माण कम्पनिले चार करोड ८८ लाख ७२ हजार एक सय २३ रुपैयाँमा २०७८ बैशाख १२ गते सम्झौता गरेको थियो । उक्त सम्झौता बमोजिम २०८० को जेठ भित्र निर्माण सम्पन्न गरि सक्नु पर्ने भएता पनि हालसम्म पनि निर्माण सम्पन्न नभएको अर्यालको भनाइ छ । हालसम्म भौतिक प्रगति ६५ प्रतिशत र आर्थिक प्रगति करिब ५० प्रतिशत भएको देखिन्छ । गाउँपालिकाले निर्माण कम्पनीलाई दुई करोड ३४ लाख ५९ हजार सात सय ८२ रुपैयाँ भुक्तानी गरि सकेको छ ।
गाउँपालिकाका सब इन्जिनियर लोकेन्द्र बहादुर रावलले अस्पताल भवन निर्माणका लागि भएको सम्झौता बमोजिमको म्याद सकिएपछि दुई पटक एक/एक वर्ष म्याद थप गरिएको बताउनुभयो । पहिलो पटक म्याद सकिएपछि २०८० जेठ २५ गते थपिएको थियो भने त्यस पछि पुनः थप गरेको म्याद २०८२ असार २५ गते सकिने उहाँको भनाइ छ ।
आकस्मिक, अन्तरंग, बहिरंग, प्रयोगशाला, प्रशासनिक, औषधि भण्डारण, उपचारका लागि छुट्टाछुट्टै कक्ष सहितको भूकम्प प्रतिरोधी क्षमताको अपाङ्गमैत्री भवन निर्माण हुनेछ ।