आदर्श अनलाइन, बागलुङ
नयाँ वर्ष २०८१ तथा चैते दशै २०८० को अवसर पारेर हाइकर्स युनाईटेड बागलुङले आयोजना गरेको अन्तर कलेज स्तरीय बास्केटबल प्रतियोगिताको उपाधि न्यू ओएसिस एकेडेमीले हासिल गरेको छ ।
फाइनल खेलमा फ्युचर ब्राईटर माध्यमिक विद्यालयलाई १६ का विरुद्ध २४ अंकले न्यू ओएसिसले जित हात पारेको हो ।
प्रतियोगितामा प्रथम भएको न्यू ओएसिस एकेडेमीले १५ हजार ५५५ नगद, ट्रफी, प्रमाणपत्र र मेडल तथा दोस्रो भएको फ्युचर ब्राईटर मा.विले ७ हजार ७७७ रुपैया नगद, ट्रफी, प्रमाणपत्र, मेडल प्राप्त गरेको हाइकर्स युनाईटेड बागलुङका सदस्य धिरन पुनले बताउनुभयो ।
साथै सर्वोत्कृष्ट खेलाडिबाट न्यू ओएसिस एकेडेमीका यश रायमाझी, सर्वाधिक स्कोररबाट सोही टिमकै एलोन रोका र फाइनल खेलका पेलयर अफ द म्याचबाट फ्युचर ब्राईटरका रोहित थापा पुरस्कृत भएको आयोजक हाइकर्स युनाईटेड बागलुङका सदस्य सन्तोष क्षेत्रीले जानकारी दिनुभयो ।
बानपा–४ उपल्लाचौरमा सञ्चालन भएको बास्केटबल प्रतियोगितामा विभिन्न ७ विद्यालयका ८ टिमको सहभागिता रहेको थियो ।
खेल समापन कार्यक्रम हाइकर्स युनाईटेड बागलुङका अध्यक्ष प्रवेश शर्माको अध्यक्षता र सदस्य रोहन जिसीको सञ्चालनमा सम्पन्न भएको थियो ।
विजेता र उपविजेतालाई कार्यक्रमका मुख्य प्रायोजक महालक्ष्मी ट्रेडर्सका सञ्चालक रुद्रारन्स श्रेष्ठ, नेपाल जेसीजका उपाध्यक्ष सौरभ श्रेष्ठ लगायतले पुरस्कार प्रदान गर्नु भएको थियो ।
