बागलुङ नगरपालिकालाई व्यवसायीको सामान फिर्ता गर्न उद्योग वाणिज्य संघको ध्यानाकर्षण

आदर्श सञ्चार, बागलुङ
बागलुङ नगरपालिकाका कर्मचारी र नगर प्रहरीले बागलुङ बजारको सडक पेटी खाली गर्ने नाममा व्यवसायीलाई दुख दिएको भन्दै उद्योग वाणिज्य संघले गम्भीर ध्यानाकर्षण भएको जनाएको छ ।

व्यवसायीक स्थलबाट जथाभावी सामान उठाएको, शाक्ति प्रदर्शन गरि धम्काउने र अमानविय व्यवहार गरेको भन्दै उद्योग वाणिज्य संघले विज्ञप्ती जारी गरेको छ । उद्योग वाणिज्य संघ बागलुङका अध्यक्ष नरेश कंडेलद्वारा जारि गरेको विञप्तीमा व्यवसायीको सामाजिक मान मर्यादामा आँच पुर्याउने, धम्काउने जस्ता अमानवीय व्यवहार प्रदर्शन गरेको घटना प्रति आम उद्यमी व्यवसायी र यस संघको गम्भीर ध्यानाकर्षण भएको उल्लेख गरिएको छ ।

स्थानीय सरकारले उद्यमी व्यवसायी एंव सरोकारवालाहरुसँग सहकार्य गरी बागलुङको आर्थिक विकास र अर्थतन्त्रमा सकारात्मक योगदान दिने गरि वातावरण निर्माण गर्नुपर्नेमा उल्टै पटक–पटक व्यवसायिलाई हतोत्साहित गराएको संघले जनाएको छ । बैङ्क तथा बित्तिय संस्थाहरुको चर्को व्याज, जरिवाना, हर्जना, महङ्गो घर भाडा लगायतका शुल्कले व्यवसाय सञ्चालन गर्न नसक्ने अवस्थाका कारण व्यवसायी व्यवसाय छाड्न बाध्य भएको, व्यवसायी विदेश पलायन भएको वर्तमान परिस्थीतिमा बागलुङ नगरपलिकाले स्थानीय उद्यमी, व्यवसायी जसले नेपालकै परिवेशमा सबैभन्दा बढि व्यवसायीक कर र अन्य दर्जनौं शिर्षकका कर बुझाउन वाध्यकारी अवस्थामा सिर्जना गरेको उल्लेख गरिएको छ ।

संघले उद्यमी व्यवसायीहरुको पसल बाट उठाएका सामानहरु तत्कालै बिना शर्त सकुसल अवस्थामा फिर्ता गर्न माग गरेको छ । अन्यथा यस्ता उद्यमी तथा व्यवसायीहरुको मनोवल गिर्ने गरी गरेको यस्ता कार्यको विरुद्धमा आन्दोलनमा उत्रने चेतावनी सहित विगतलाई स्मरण गर्नकोलागि समेत अनुरोध गरेको छ । बजारका दर्जनौँ सटर र घरहरु खाली भईरहेको, पार्किङ, फुटपाथ, बजारको सुरक्षा व्यवस्थापन गर्न उदासिन नगरपालिकाले सरोकारवालाको परामर्श बिना लिएका योजनाले नागरिक र करदाताको दैनिक जीवनलाई असहज बनाउने र दीर्घकालिन आर्थिक असर पुर्याउने हुँदा जिल्लामा क्रियाशिल राजनैतिक दल एवं अन्य सरोकारवाला निकायले समेत यस तर्फ विशेष ध्यान दिन संघले अपिल गरेको छ ।

बजार क्षेत्रको समस्याहरु समाधान गर्नका लागि संघको तर्फबाट नगरपालिकालाई समस्या समाधानकोलागि सुझाव पत्र समेत बुझाएर साझेदारीमा काम गर्ने तय गरिएका विषयवस्तुलाई वेवास्ता गर्दै एक पक्षिजाँदा निजी क्षेत्रसँगै अन्य क्षेत्र पनि धरासायी बन्ने खतरा तर्फ सबै सजक बन्न अनुरोधका गरेको छ ।