आदर्श अनलाइन, बागलुङ
वर्खाको समयमा समेत नदीजन्य पदार्थ उत्खनन भएको जन गुनासो बढे पछि जिल्ला समन्वय समिति बागलुङले बर्खायाममा उत्खननमा पूर्ण बन्देज लगाउने निर्णय गरेको छ ।
जिल्ला समन्वय समिति प्रमुख राजेन्द्र ढुङ्गानाको अध्यक्षतामा बसेको बैठकले असार १ गतेदेखि भदौ १५ सम्म नदीबाट ढुङ्गा गिटी बालुवा उत्खनन् गर्ने, क्रसिङ गर्न नपाईने व्यवस्था भए पनि गैरकानुनी उत्खनन् गर्ने कार्य अहिले पनि जारी रहेकाले त्यसलाई रोक्ने निर्णय गरेको हो ।
गण्डकी प्रदेशबाट जारी भएको ढुङ्गा गिटी, बालुवा उत्खनन् संकलन, क्रसिङ र विक्री वितरण तथा क्रसर उद्योग स्थापना र सञ्चालनलाई व्यवस्थीत गर्न बनेको कार्यविधि २०७५ को दफा ६९५० मा ढुङ्गा गिटी बालुवा माटो चट्टान उत्खनन् तथा संकलन कार्य असार १ गतेदेखि भाद्र १५ सम्म गर्न पाईने छैन भन्ने व्यवस्था छ । बागलुङमा जिल्लाका विभिन्न पालिकामा सो अवधिमा ढुङ्गा गिटी, बालुवाको उत्खनन् र संकलन गरेको जनगुनासो आएको र अनुगमनमा क्रममा केही स्थानमा उत्खनन् र संकलन गरिररहेको देखिएकाले गैरकानुनी रुपमा ऐन, नियम, कानुन, मापदण्ड कार्यविधि व्यवस्था विपरित ढुङ्गा गिटी बालुवाको उत्खन्नन विक्री वितरण कार्यमा तत्काल रोक लगाई ऐन नियम कानुन मापदण्ड र कार्यविधि बमोजिम प्रक्रिया पूरा गरी उक्त कार्य गर्न गराउन सबै पालिका तथा सम्बन्धित निकायलाई अनुरोध गर्ने निर्णय गरेको जिल्ला समन्वय समितिका प्रमुख राजेन्द्र ढुङ्गानाले बताउनुभयो ।
कोभिडको समयमा जिल्ला बिभिन्न व्यक्ति संस्थाबाट आएको सहयोगको कुनै तथ्याङ्क नभेटिएको र त्यसको वितरणको अवस्था बारेमा एकद्वार प्रणालीबाट सार्वजनिक गर्न समेत अनुरोध गरेको छ ।
पछिल्लो समय ढुङ्गा गिटी र बालुवा निकाल्नका लागि वातावरणीय प्रभाव मुल्याङ्कन पास गर्ने अधिकार पनि स्थानीय तहलाई दिएका कारण आफ्नो अनुकुलतामा आईई गरेको भेटिएकाले यो विषयलाई समन्वय समितिले विशेष ध्यानाकर्षण गराउने निर्णय गरेको ढुङ्गानाको भनाई छ ।
