आदर्श सञ्चार, बागलुङ
गण्डकी प्रदेश सहकारी रजिष्ट्रारको कार्यालय पोखराका रजिष्ट्रार भेषराज रिजालले सहकारीको मर्म, भावना र उद्देश्य अनुसार अगाडि बढ्न सकेमा मात्रै सहकारीलाई क्षेत्रको विश्वासनीयता पुरानै लयमा फर्कने बताउनु भएको छ ।
६८ औं राष्ट्रिय सहकारी दिवसको अवसर पारेर जिल्ला सहकारी संघ बागलुङले रजिष्ट्रार कार्यालयको सहयोगमा आयोजना गरेको एक दिने अन्तरक्रिया कार्यक्रममा बोल्दै रजिष्ट्रार रिजालले यस्तो बताउनु भएको हो ।
विगत २ वर्ष सहकारी क्षेत्रका लागि अलि धेरै चुनौतीपूर्ण रह्यो, विस्तारै सहकारीले पुरानै लय समाउन थालेको छ, सहकारीका समस्याहरुको पहिचान भइसकेको छ, राज्यका तर्फबाट कानुनी जटिलताहरु परिवर्तन गर्ने काम पनि भएको छ, रजिष्ट्रार रिजालले भन्नुभयो,–‘सहकारी सदस्यको सक्रियतामा सञ्चालन हुने व्यवसाय हो भन्ने कुरा सञ्चालकहरुले राम्रोसंग मनन गरे सहकारीले छिटै पुरानै लय समाउछ ।’
सहकारीको समसामयिक अवस्था, रजिष्ट्रार कार्यालयका तर्फबाट भएका पहलकदमी लगायतका विषयमा सहजीकरण गर्दै रजिष्ट्रार रिजालले कानुनको पूर्ण पालना गर्दै सदस्यको सक्रिय सहभागिता गराउनतर्फ सहकारीहरु अग्रसर हुनु पर्नेमा जोड दिनुभयो ।
सहकारीका सञ्चालक र व्यवस्थापनको जिम्मेवारीमा रहेका व्यक्तिहरुले सदस्यको रकमलाई सही तरिकाले परिचालन गर्ने, नियमननकारी निकायले समय समयमा नियमन गर्ने र सदस्यहरुले सञ्चालकहरुलाई रचनात्मक सहयोग तथा कमी कमजोरीमा खबरदारी गर्ने हो भने सहकारीलाई पुरानै लयमा फर्काउन सकिने उहाँको भनाइ थियो ।
सहकारी सदस्यको साथ र सहयोगमा अगाडि बढ्ने व्यवसाय हो, सदस्यहरुको सक्रियता बढाउने विषयमा सञ्चालकको भूमिका प्रभावकारी नभएका कारण, कतिपय सञ्चालक तथा व्यवस्थापनको जिम्मेवारीमा रहेकाहरुको नियत खराव भएका कारण सहकारी क्षेत्रमा चुनौती बढेको उहाँले बताउनुभयो ।
कार्यक्रममा नेपाल सूचना तथा सञ्चार केन्द्रीय सहकारी संघका केन्द्रीय अध्यक्ष मन कुमारी केसीले समुदायको आर्थिक विकास र सामाजिक रुपान्तरणको महत्वपूर्ण पाटो सहकारी क्षेत्रलाई बद्नाम गराउने, कमजोर बनाउने, विवादित बनाउने र व्यक्तिगत धन आर्जन गर्न खोज्नेहरुका कारण समस्या सिर्जना भएको बताउनु भयो । उहाँले सहकारीमा कस्ता मान्छे सहभागी हुने, सहकारी कसले चलाउने भन्ने कुरामा समेत सचेत हुनु पर्ने बेला आएको बताउनुभयो ।
कार्यक्रममा जिल्ला सहकारी संघका सल्लाहकारहरु राम बहादुर जिसी र तेजेन्द्र थापा मगर, जिल्ला कृषि सहकारी संघका अध्यक्ष नर बहादुर थापा, स्वास्थ्य सहकारी संघका अध्यक्ष सिता शर्मा, राष्ट्रिय सहकारी बैंकका शाखा प्रमुख अमृत श्रेष्ठ लगायतले मन्तव्य व्यक्त गर्नुभ भएको थियो । कार्यक्रम जिल्ला सहकारी संघका अध्यक्ष हुमा कुमारी जि.सी.अञ्जु को अध्यक्षता, उपाध्यक्ष पिंगला खड्का जिसीको सञ्चालन र सञ्चालक जगन्नाथ सापकोटाको स्वागतमा सम्पन्न भएको थियो ।