सम्पदा अंकित स्पोर्टको आयोजनामा भएको प्रतियोगिताको फाइनल खेलमा फ्युचर ब्राईटर बोर्डिङ स्कुलको निलो टिमलाई १–० गोल अन्तरले पराजित गर्दै मनसुन एक्स केभी एकेडेमी च्याम्पियन बनेको हो । एसईई परीक्षा दिएर बसेका विद्यार्थीहरूमा खेलप्रति रुचि अभिवृद्धि गर्ने उद्देश्यसहित प्रतियोगिता आयोजना गरिएको आयोजकले जनाएको छ । उपाधिसँगै विजेता मनसुन एक्स केभी एकेडेमीले नगद १५ हजार रुपैयाँ, ट्रफी, मेडल तथा प्रमाणपत्र प्राप्त गरेको छ ।
उपविजेता बनेको फ्युचर ब्राईटर बोर्डिङ स्कुलको निलो टिमले नगद ८ हजार रुपैयाँसहित ट्रफी, मेडल र प्रमाणपत्र प्राप्त गरेको सम्पदा अंकित स्पोर्टका सञ्चालक सौगात खड्काले जानकारी दिनुभयो । प्रतियोगितामा फ्युचर ब्राईटर बोर्डिङ स्कुलको निलो टिमका अरुण भण्डारी सर्वोत्कृष्ट खेलाडी घोषित भए । त्यसैगरी, मनसुन एक्स केभी एकेडेमीका सज्जन घर्ती उत्कृष्ट गोलरक्षक, गुराँस विद्या सदनका सन्दीप हमाल उदयमान खेलाडी तथा मनसुन एक्स केभी एकेडेमीका शितल थापा सर्वाधिक गोलकर्ता घोषित भए । अनुशासित टिमको उपाधि गुराँस विद्या सदनले प्राप्त गरेको थियो । विजेताहरूलाई विधागत ट्रफी प्रदान गरिएको थियो ।
कार्यक्रममा कालिका भगवती गुठी व्यवस्थापन समितिका अध्यक्ष भुपेन्द्र खड्का, हिसान धौलागिरीका अध्यक्ष बालकृष्ण शर्मा तथा चिल्ड्रेन लाइफ बोर्डिङ स्कुलका प्रिन्सिपल नवराज श्रेष्ठले शुभकामना मन्तव्य व्यक्त गर्नुभएको थियो । प्रतियोगितामा बागलुङ र म्याग्दी जिल्लाका विभिन्न विद्यालयका २२ टिमको सहभागिता रहेको थियो । कार्यक्रम सम्पदा अंकित स्पोर्टका सञ्चालक सौगात खड्काको अध्यक्षता तथा पत्रकार रोहन जिसीको सञ्चालनमा सम्पन्न भएको थियो ।