प्रविधिको सही प्रयोग गरौं, लैंगिक हिंसाको अन्त्य गरौ जस्ता नारासहित सचेतनामूलक कार्यक्रमहरू नगरपालिकाका १४ वटै वडाहरुमा संचालन भैरहेका छन । जसको मुख्य लक्ष्य महिला तथा बालबालिका विरुद्धको हिंसा अन्त्यका लागि जनचेतना जगाउनु र कानूनी तथा सामाजिक संरचनामा सुधार ल्याउनु रहेको छ ।
कार्यक्रममा बागलुङ नगरपालिकामा रहेको हिंसा प्रभावितहरुको सेवा केन्द्र, धौलागिरी अस्पतालमा रहेको ओसिएमसी तथा जिल्ला प्रहरी कार्यालयको महिला तथा बालबालिका शाखाले लैंगिक हिंसामा परेका प्रभावितहरुलाई गरिने सहयोग र पिडकलाई हुने कारवाहीको कानुनी व्यवस्थाबारेमा प्रस्तृतिकरण गरिएको थियो ।
कार्यक्रममा बागलुङ नगरपालिकाका नगर उप प्रमुख राजु खड्काले लैंगिक हिंसा न्यूनिकरणका लागि आम नागरिकहरुमा सचेतना जरुरी रहेको बताउदै वडास्तरमा रहेका टोल विकास सस्था, क्लब तथा महिला समूहहरुले लैंगिक हिंसा अन्तका लागि योजना बनाउनु पर्नेमा जोड दिनु भयो । समुदायस्तरमा महिलामैत्री नीति तथा कार्यक्रम बनाउदै प्रचलित कानुनी व्यवस्थाका बारेमा सामूहिक रुपमा अभियान चलाउन आग्रह गर्दै आर्थिक बिकास, उत्पादन, रोजगारी, शिपमुलक कार्यक्रम तथा आवश्यक तालिमलाई प्राथमिकता दिएर कार्यक्रम चलाउन पर्नेमा जोड दिनु भयो ।
कार्यक्रममा लैंगिक हिंसा र मानसिक स्वास्थ्यबारे मनोसामाजिक परामर्शकर्ता सिलसिला श्रेष्ठ, ओसिएमसीका डा.सन्दिप के.सी, बानपा महिला बालबालिका शाखा प्रमुख रचना आचार्य तथा जिल्ला प्रहरी कार्यालयका प्रहरी नायव निरिक्षक सुदिप भट्राईले सहजिकरण गर्नु भएको थियो । तित्याङमा आयोजित कार्यक्रमको अध्यक्षता हिंसा न्यूनिकरणका लागि वडास्तरीय निगरानी समिति संयोजक माया बोहोरा तथा बानपा १० को अन्तक्रियात्मक कार्यक्रमको अध्यक्षता वडा अध्यक्ष तिल बहादुर थापाले गर्नु भएको थियो ।
