बागलुङ । जस्ताले छाएका टहरा, ३० वर्ष पुरानो साँघुरो भवन र भाडाका कोठामा प्रहरीको आवास । जिल्ला सदरमुकाममै रहेको जिल्ला प्रहरी कार्यालय बागलुङको अवस्था कुनै दुर्गम गाउँको प्रहरी चौकीभन्दा फरक थिएन ।
जग्गा भएर पनि पर्याप्त भवन नहुँदा प्रशासनिक कामदेखि प्रहरी आवास र हिरासत कक्षसम्म एउटै पुरानो भवनबाट सञ्चालन गर्नुपर्ने बाध्यता थियो । तर, प्रहरी परिसरभित्र एकैपटक चारवटा नयाँ भवन निर्माण भएपछि प्रहरीको वर्षौंदेखिको भौतिक पूर्वाधारसम्बन्धी समस्या समाधान भएको छ । नयाँ भवन निर्माणसँगै प्रहरीलाई आवासको व्यवस्था भएको छ भने व्यारेक, हिरासत कक्ष र कार्यालय प्रमुखको निवाससमेत बनेको छ । यसअघि भाडाको कोठामा बस्दै आएका प्रहरी अब कार्यालय परिसरभित्रै बस्न थालेका छन् ।
जिल्ला प्रहरी कार्यालयका प्रमुख प्रहरी उपरीक्षक फडिन्द्र प्रसाईका अनुसार पुरानो भवनबाट प्रशासनिक काम, हिरासत कक्ष र हातहतियार भण्डारणसमेत गर्नुपर्ने अवस्था थियो । प्रहरी आवासका लागि पर्याप्त ठाउँ नहुँदा केही प्रहरी भाडाको कोठामा बस्नुपर्ने बाध्यता थियो ।
“जिल्ला सदरमुकामकै प्रहरी कार्यालयका प्रहरी भाडाको कोठामा बस्नुपर्ने अवस्था थियो, एउटै भवनबाट प्रशासनिक कामदेखि हिरासत कक्ष र हातहतियार भण्डारणसम्मको काम गर्नुपर्ने बाध्यता थियो”, उहाँले भन्नुभयो, “अहिले व्यारेक, हिरासत कक्ष, प्रहरी आवास र कार्यालय प्रमुखको निवास गरी चारवटा सुविधासम्पन्न भवन निर्माण भएका छन् ।”
संघीय सरकारको प्रहरी पूर्वाधार निर्माण कार्यक्रमअन्तर्गत रु. नौ करोड ७१ लाख ९३ हजार ५०० लागतमा प्रहरी परिसरमा व्यारेक, हिरासत कक्ष, वरिष्ठ प्रहरी अधिकृतको आवास, कार्यालय प्रमुखको निवास, मोटर ग्यारेज, पर्खाल र प्रवेशद्वार निर्माण गरिएको छ । पुरानो कार्यालय भवनको मर्मतसम्भार र सौन्दर्यकरणसमेत गरिएको छ ।
प्रहरी प्रधान कार्यालयले तयार गरेको गुरुयोजनाअनुसार निर्माण गरिएको उक्त संरचनाको काम सम्पन्न भएपछि गत भदौ १० गते प्रहरी महानिरीक्षक दानबहादुर कार्कीले उद्घाटन गर्नुभएको थियो । जिल्ला प्रहरी कार्यालय र बिएन निर्माण कम्पनीबीच २०७९ मङ्सिर १३ गते ठेक्का सम्झौता भएकोमा २०८३ जेठ २५ गते निर्माण सम्पन्न भएको हो । नवनिर्मित व्यारेक भवनको भुइँतलामा मेस, भण्डार कक्ष तथा प्रहरी कर्मचारीका लागि आवासको व्यवस्था गरिएको छ । महिला प्रहरीका लागि छुट्टै सुविधासम्पन्न व्यारेकसमेत निर्माण गरिएको छ । पहिलो र दोस्रो तलासहित आठ हजार ६७१ वर्गफिट क्षेत्रफलमा निर्माण गरिएको उक्त भवनमा १४० जना प्रहरी बस्न सक्ने क्षमता छ ।
त्यस्तै, प्रहरी परिसरमा महिला र पुरुषका लागि छुट्टाछुट्टै हिरासत कक्ष निर्माण गरिएको छ । हिरासत भवनमा सुरक्षा कक्ष, भेटघाट कक्ष, नाबालिगका लागि दुईवटा छुट्टै हिरासत कक्ष, अन्तरवार्ता कक्ष र हातहतियार भण्डारण कक्षको व्यवस्था गरिएको छ । शौचालयसहितको हिरासत कक्ष निर्माण भएपछि थुनुवाको व्यवस्थापनसमेत सहज भएको छ ।
प्रहरी अधिकृत र कार्यालय प्रमुखका लागि दुईवटा आवासीय भवन निर्माण गरिएका छन् । यसअघि कार्यालय प्रमुखको निवाससमेत पुरानो अञ्चल प्रहरी कार्यालयबाट सञ्चालन हुँदै आएको थियो । पर्याप्त कार्यकक्ष र आवासको व्यवस्था भएपछि प्रहरीको दैनिक कार्यसम्पादन, सुरक्षा व्यवस्थापन र सेवा प्रवाहमा सहजता थपिएको प्रहरीको भनाइ छ । सुरक्षित र सुविधासम्पन्न वातावरणमा बस्न पाउँदा प्रहरी कर्मचारीको मनोबलसमेत बढ्ने अपेक्षा गरिएको छ । जिल्ला सदरमुकामस्थित प्रहरी कार्यालयको भौतिक अवस्था सुधार भए पनि जिल्लाका अन्य प्रहरी चौकीको अवस्था भने अझै कमजोर छ । जिल्लाभरका १५ वटा प्रहरी चौकी भाडाका घरबाट सञ्चालन भइरहेका छन् ।
प्रहरी उपरीक्षक प्रसाईका अनुसार जिल्लाका आठवटा प्रहरी चौकीको आफ्नै जग्गा छैन भने जग्गा भएका सातवटा चौकीमा समेत भवन निर्माण हुन सकेको छैन । जिल्लाको मुख्य प्रवेशद्वार मालढुङ्गास्थित प्रहरी चौकीका प्रहरी भवन अभावमा चार वर्षदेखि घाटको सत्तलमा बसेर सेवा दिइरहेका छन् । उक्त चौकीका लागि भने अहिले भवन निर्माणको शिलान्यास गरिएको छ ।
