बागलुङ । बागलुङमा आधा अर्ब लागतमा साना–ठूला ११ सडक आयोजना एकसाथ स्तरोन्नतिको चरणमा पुगेका छन् ।
सडक डिभिजन कार्यालय अन्र्तगत अहिले बागलुङका विभिन्न स्थानमा एघार सडक ठेक्का मार्फत धमाधम स्तरोन्नति भइरहेका छन् । रु. दुई करोडदेखि रु.२५ करोड सम्मका बागलुङ जिल्लाभर ११ सडक धमाधम स्तरोन्नति भइरहेको सडक डिभिजन कार्यालय बागलुङले जनाएको छ ।
२०७९ सालमा ठेक्का सम्झौता भएको गलकोट नगरपालिकाको हरिचौर–मल्म–पाण्डवखानी–रमुवा–भिमगिठे–निसीखोला सडक रु. २५ करोड लागतमा कालोपत्रका लागि स्तरोन्नति अन्तिम चरणमा पुगेको हो । कार्यालयबाट सञ्चालित सबैभन्दा ठूलो योजनाको रुपमा रहेको उक्त सडकको भौतिक प्रगती ७० प्रतिशत रहेको छ । अन्य १० सडक भने २०८१ यता मात्रै सम्झौता गरेका सडक हुन् ।
जिल्लाभर सडक डिभिजन कार्यालय मार्फत रु. ४९ करोड ५४ लाखका ११ सडकको स्तरोन्नति भइरहेको डिभिजन सडक कार्यालय बागलुङका प्रमुख हरी सुवेदीले जानकारी दिनुभयो । सुवेदीका अनुसार अन्य योजना २०८१ पछिको सम्झौता भएपनि हरीचौर–मल्म–पाण्डवखानी सडक कालोपत्रमा ढिलाई भइरहेको छ ।
पाखुते–बायोखोला–झिम्पा–निसी सडकखण्डमा पहिरो पन्छाउने, सडक खन्ने तथा सडक स्तरोन्नतिको काम भइरहेको छ । रु. १ करोड ५८ लाख लागतमा एमएस इन्द्रेणी जावला जेभीसंग सम्झौता भएर काम भइरहेको छ । उक्त सडकको भौतिक प्रगति ५५ प्रतिशत रहेको छ ।
यस्तै गलकोट नगरपालिका–१० स्थित रणसिंहकिटेनी दोभानदेखि रामुवा सडक खण्डमा रु. १ करोड ३२ लाखमा एमएसकोण्डा सर्वसिद्धि जेभीसंग २०८२ मंसिरमा ठेक्का सम्झौता गरी धमाधम स्तरोन्नतीको काम शुरु गरिएको छ ।
यस्तै अछेते–मुल्ठाना–सिम सडक स्तरोन्नतिका लागि रु. २ करोड ११ लाखमा ठेक्का सम्झौता गरी काम अघिबढेको छ । हालै शुरु गरिएको उक्त सडकको भौतीक प्रगति ५५ प्रतिशत रहेको छ ।
यस्तै फलेवास नगरपालिकाको दुल्लेबेंसी–अमरपुरी–दरौदी–सुन्तलाचौर सडक सुधारका लागि करिब रु.२ करोड ४३ लाखमा धमाधम सडक स्तरोन्नति भइरहेको छ । उक्त सडकको प्रगति ६० प्रतिशत पुगेको छ । उक्त सडक २०८३ असारमा हस्तान्तरण भइसक्नुपर्ने हुन्छ ।
त्यस्तै आदर्श प्रावि डाँडाथरदेखि स्यालपाखाहुँदै भैरवस्थान जोड्ने सडकमा समेत सतरोन्नतिको काम भइरहेको छ । रु. दुई करोड १७ लाख लागतमा उक्त सडकको काम ५४ प्रतिशत सम्पन्न भइसकेको हो । यस्तै मंगलीखोला–धाम्जा–बेलढुंगा–म्याग्दी सडक रु. द्यूई करोड २९ लाखमा ठेक्का २०८२ पुसमा सम्झौता गरी सडक स्तरोन्नतिको काम शुरु भएको छ ।
यस्तै बाङ्गेचौर–उपल्लाचौर सडक सुधारका लागि रु. ६ करोड ७२ लाखमा २०८१ माघमा सम्झौता गरी स्तरोन्नति भएर कालोपत्रको चरणमा पुगेको छ । उक्त सडक कालोपत्र गर्न ग्राभेलको तयारी भइरहेको छ । यस्तै बागलुङ नगरपालिका–३ रात्माटा–कोलको–घुम्ती–रिठाबोट–पाखाथर हुँदै कुँडुले जोड्ने सडकमा रु. २ करोड २५ लाखको लागतमा ५५ प्रतिशत सडक स्तरोन्नति, बागलुङको डोठेतालदेखि राम्तोला सम्मको सडक दुई चरणमा रु. ५ करोड ५० लाखमा स्तरोन्नति भइरहेको छ ।
